आर्मी आहा रारा गोल्डकपको फाइनलमा

काठमाडौं- विभागीय टोली त्रिभुवन आर्मी क्लबले दाउफिन्स फुटबल क्लबलाई पराजित गर्दै आहा रारा गोल्डकपको फाइनलमा प्रवेश गरेको छ । शुक्रबार भएको खेलमा आर्मीले दाउफिन्सलाई १-० ले पराजित गरेको हो । 

आर्मीको जितका लागि खेलको एकमात्र निर्णायक गोल टेकबहादुर बुढाथोकीले गरे । उनले खेलको १३ औं मिनेटमा गोल गर्दै आर्मीलाई महत्वपूर्ण जित दिलाए । पहिलो हाफमा १-० ले अग्रता लिएको आर्मीले दोस्रो हाफमा अन्य अवसर सृजना गरे पनि थप गोल डगर्न सकेन् । 

त्यस्तै दाउफिन्सका खेलाडीले आक्रमक खेल प्रस्तुत गरेपनि गोल गर्न सकेनन् । खेलको ८५ औं मिनेटमा दाउफिन्स १० खेलाडीमा समेटिएको थियो । डेम्बा ओवुनाले विकास तामाङलाई ट्याकल गरेपछि रेफ्रिले उनलाई दोस्रो पहेंलो कार्ड देखाए ।

आर्मीले अब प्रतियोगिताको फाइनलमा शनिबार रुस्लान थ्री स्टारको सामना गर्नेछ । थ्री स्टारले बुधबार एपीएफलाई टाइब्रेकरमा पराजित गर्दै फाइनल प्रवेश गरेको थियो ।