पिएसएल : आफ्नो तेस्रो खेलमा सन्दीपको प्रदर्शन कस्तो रहला?

काठमाडौं- नेपाली राष्ट्रिय टोलीका लेग ब्रेक स्पिनर सन्दीप लामिछानेले पाकिस्तान सुपर लिग (पिएसएल)मा आज (बुधबार) आफ्नो तेस्रो खेल खेल्दै छन् । लाहोर क्वालेण्डर्सबाट पिएसएल खेली रहेका सन्दीपले क्वेटा ग्लाडियटर्सविरुद्ध मैदान उत्रिने मौका पाए यो तेस्रो खेल हुने छ ।

खेल नेपाली समय अनुसार साँझ ५:१५ मा सुरु हुनेछ । पिएसएलका दुई खेल मात्र खेलेका सन्दीपले निकैनै राम्रो सुरुवात गरेका छन् । उनले दुई खेल खेल्दै चार विकट लिएका छन् । 

डेब्यु खेलमा आफ्नो उत्कृष्ट प्रदर्शन देखाउँदै सन्दीपले तीन विकेट लिएका थिए । त्यस्तै दोस्रो खेलमा क्वेटाविरुद्ध नै शनिबार भएको खेलमा ४ ओभर बलिङ गर्दै २० रन खर्चिएर १ विकेट लिएका थिए । 

पछिल्ला पाँच खेलमा लाहोरले क्वेटालाई हराउन सकेको छैन । जसको कारण बुधबार लाहोरलाई जित निकाल्न निकै मेहनत गर्नु पर्ने देखिन्छ । पाँच खेलमा ४ जितसहित क्वेटा लिगको शीर्ष स्थानमा रहेको छ । पाँच खेलमा २ जित निकाल्न सफल लाहोर अंक तालिकाको चौथो स्थानमा रहेको छ ।