सन्दीपलाई वेष्टइन्डिजमा ‘ब्रेकथ्रु स्टार अवार्ड’

काठमाडौं- नेपाली राष्ट्रिय क्रकेट टोलीका लेग ब्रेक स्पिनर सन्दीप लामिछानेले वेष्टइन्डिजको क्यारेबियन प्रिमियर लिग (सिपिएल)अन्तर्गत ‘ब्रेकथ्रु स्टार’को अवार्ड जितेका छन् । गत सिजनको सिपिएलमा उत्कृष्ट प्रदर्शन गरेका सन्दीपलाई उक्त अवार्ड प्रदान गरिएको हो ।

गत सिजन सिपिएलका लागि उनी पाँच हजार अमेरिकी डलरमा टिम सेन्ट किट्स एन्ड नाभिस प्याट्रिओट्समा आबद्ध भएका थिए । सिपिएलमा सन्दीपले उत्कृष्ट प्रदर्शन गर्दै पाँच खेलमा सात विकेट लिएका थिए । 

गत वर्षबाट इण्डियन प्रिमियर लिगबाट टि-२० लिगमा ‘डेब्यू’ गरेको सन्दीपले यही एक वर्षमा क्यारेबियन प्रिमियर लिग, ग्लोबल टि-२० क्यानडा, अफगानिस्तान प्रिमियर लिग, टि-१० लिग र अष्ट्रेलियाको बिगबास लिगमा आफ्नो उपस्थिति जनाएका मात्र छैनन्, विश्व क्रिकेटका हस्ती ब्याट्सम्यानलाई ‘पभेलियन’ पनि फर्काएका छन् ।

सन्दीप हाल पाकिस्तान सुपरलिगका लागि युएईमा छन् । सन्दीपले अहिलेसम्म नौ विदेशी लिग खेलिसकेका छन् । सन्दीप आबद्ध भएका विदेशी लिगमा आइपिएल (भारत), ग्लोबल टी-२० (क्यानडा), सिपिएल (वेस्टइन्डिज), एपिएल (अफगानिस्तान), टी-१० (युएई), बिबिएल (अस्ट्रेलिया), बिपिएल (बङ्गलादेश), हङकङ टी-२० ब्लिज, पिएसएल (पाकिस्तान) छन् ।