लिभरपुल र बार्यन बराबरीमा रोकिए

एजेन्सी- इंग्लिस प्रिमियर लिग क्लब लिभरपुलले बुन्डेसलिगा क्लब बायर्न म्युनिखसँग बराबरी खेलेको छ । मंगलबार राती लिभरपुलको घरेलु मैदानमा भएको यूईएफए च्याम्पियन्स लिगको प्रि-क्वाटरफाइनलको पहिलो लेगमा दुबै टोलीले गोलरहित बराबरी खेलेका हुन् ।

यस बराबरीसँगै बायर्नले लिभरपुलको मैदानमा लगातार तेस्रो पटक गोलरहित बराबरी खेलेको छ । रक्षात्मक रणनीति अपनाउँदै राम्रो प्रदर्शन गरेको बार्यनले लिभरपुललाई उसको घरेलु मैदानमा गोल गर्ने कुनै मौका दिएन । 

लिभरपुलका साडियो मानेले प्रयास गरेका झन्डै आधा दर्जन प्रहार सफल हुन सकेनन् । बायर्नले पनि पाएको थोरै अवसरमा अपेक्षित आक्रमण गर्न नसक्दा गोलरहित बराबरीमा चित्त बुझाउनुपर्यो । दोस्रो लेगको खेल बायर्नको घरेलु मैदानमा १३ मार्चमा हुनेछ ।