काठमाडौंमाथि अत्तरियाको ७ विकेटको सहज जित 

धनगढी- दिपेन्द्र सिंह ऐरीको कप्तानीमा रहेको सिवाइसी अत्तरियाले ज्ञानेन्द्र मल्लको अपराजित काठमाडौं गोल्डेन्सलाई पराजित गरेको छ । मंगरबार भएको तेस्रो संस्करणको धनगढी प्रिमियर लिग (डिपिएल)को अन्तिम लिग खेलमा अत्तरियाले काठमाडौंलाई ७ विकेटले पराजित गरेको हो । 

काठमाडौंले दिएको ७६ रनको झिनो लक्ष्य पछ्याएको अत्तरियाले १७ ओभर खेल्दै मात्र ३ विकेट गुमाएर लक्ष्य भेट्टायो । अत्तरियाको जितका लागि जयकिसन कोल्सावालाले सर्वाधिक ३३ रन बनाए ।

उनले ४३ बलको सामना गर्दै ५ चौकाको मद्दतमा ३३ रन जोडेका हुन् । त्यस्तै दिन्पेन्द्र सिंह ऐरीले अविजित २० रन जोडे । उनले ११ बल खेल्दै ३ चौका प्रहार गरे । प्रेम तामाङ १०, सुबेन्दु पाण्डेय ५ र सन्दीप जोराले ७ रन जोडे ।

काठमाडौंका लागि ललितनारायण राजवंशी, रसिद खान र सुर्य तामाङले एक एक विकेट लिए । यसअघि टस जितेर पहिले ब्याटिङ गरेको काठमाडौंले निर्धारित २० ओरभमा विकेट गुमाउँदै ७५ रन जोडेको थियो । 

खराव सुरुवात गरेको काठमाडौंका लागि कप्तान ज्ञानेन्द्र मल्लले ३२ रन जोड्न बाहेक अन्य खेलाडीले उल्लेख्य प्रदर्शन गर्न सकेनन् । ज्ञानेन्द्रले ४९ बलको सामना गर्दै २ चौकाको मद्दतमा ३२ रन जोडका थिए । त्यस्तै योगेन्द्र सिंह कार्की १३ , अंकित दवासले १० जोड्दा अन्य ब्याट्सम्यानले दोहोरो अंक छुन सकेनन् । 

काठमाडौंलाई सस्तैमा समेट्न अत्तरियाका लागि दिपेन्द्र सिंह ऐरीले तीन तथा रामनरेस गिरीले दुई विकेट लिए । त्यस्तै सन्नी पटेल र भुवन कार्की एक एक विकेट लिए । 
प्रतियोगिताको लिग चरणका खेल सकिएसँगै अत्तरिया लिगको शीर्ष स्थानमा रहदै प्लेअफमा प्रवेश गरेको छ । 

यता पराजित काठमाडौं दोस्रो स्थानमा रहँदै प्लेअफमा पुगेको छ । लिग चरणमा पहिलो र दोस्रो स्थानमा रहेकाले भोली (बुधबार) फाइनल प्रवेशका लागि पुनः यी दुबै टोलीले एक अर्काको सामना गर्ने छन् । यी दुई टोली मध्य प्लेअफमा जो पराजित भएपनि फाइनल प्रवेशका लागि एक मौका आर्के पाउने छन् ।