काठमाडौंले दियो अत्तरियालाई रनको ७६ झिनो लक्ष्य

धनगढी- तेस्रो संस्करणको धनगढी प्रिमियर लिग (डिपिएल)को अन्तिम लिग खेलमा काठमाडौं गोल्डेन्सले सिवाइसी अत्तरियालाई ७६ रनको झिनो लक्ष्य सुम्पेको छ । टस जितेर पहिले ब्याटिङ गर्ने निर्णय गरेको काठमाडौंले निर्धारित २० ओरभमा सबै विकेट गुमाउँदै मात्र ७५ रन जोडेको हो । 

खराव सुरुवात गरेको काठमाडौंका लागि कप्तान ज्ञानेन्द्र मल्लले ३२ रन जोडे । उनले ४९ बलको सामना गर्दै २ चौकाको मद्दतमा ३२ रन जोडको हुन् । योगेन्द्र सिंह कार्की १३, अंकित दवासले १० जोडे । अन्य जना ब्याट्सम्यानले अत्तरियाका बलर सामु खुलेर खेल्न नसक्दा दोहोरो अंक छुन सकेनन् । 

काठमाडौंलाई सस्तैमा समेट्न अत्तरियाका लागि कप्तान दिपेन्द्र सिंह ऐरीले तीन तथा रामनरेश गिरीले दुई विकेट लिए । त्यस्तै सन्नी पटेल र भुवन कार्कीले समान एक एक विकेट लिए । दुबै टोली यसअघिनै प्लेअफमा प्रवेश गरि सकेका भएकाले यस खेलको नतिजाले अंक तालिको शीर्ष स्थान तय गर्ने छ । 

जुन टोली पराजित वा विजयी भएपनि भोली (बुधबार) पुनः यी दुबै टोलीले फाइनल प्रवेशका लागि भिड्ने छन् । किनकी यि दुबै टोली मध्यबाट पराजित वा विजयी जो भएपनि तालिकाको शीर्ष र दोस्रो स्थानमा रहने छन् ।