नेयमार सधै मार्चमा घाइते हुनुको रहस्य के हो?

एजेन्सी- विगत चार वर्षदेखि हरेक मार्च ११ आसपास नेयमार घाइते वा निलम्बित हुँदै आएका छन् । यस वर्ष पनि नेयमार मार्च ११ आसपासमा मैदान बाहिर हुन पुगेको यो पाँचौ पल्ट हो ।

सन् २०१४-१५ र २०१५-१६ को मार्च ११ मा नेयमार निलम्बित थिए । सन् २०१६-१७ को मार्च ११ मा उनी घाइते थिए । गत सिजनमा नेयमार बार्सिलोना छोडेर पिएसजी पुगे । तर, फ्रान्समा पहिलो सिजनमै उनी मार्च ११ आउने बेला घाइते भए । उनी घाइते भएसँगै पिएसजीले च्याम्पियन्स लिगमा रियल म्याड्रिडसँग पराजित हुन पुग्यो ।

यस वर्ष पनि च्याम्पियन्स लिगमा म्यानेस्टर युनाइटेडजस्तो शक्तिशाली टिमसँग भिड्ने बेलामै नेयमार घाइते छन् । चिकित्सकहरूले उनी कम्तीमा १० साता फुटबल खेल्न नसक्ने रिपोर्ट दिएका छन् । जसको अर्थ हो, उनी मार्च ११ सम्म पनि मैदान प्रवेश गर्न सक्ने छैनन् ।

मार्च ११ मा नेयमारकी बहिनीको जन्मदिन पर्छ । त्यसैले, कतिपयले नेयमार बहिनीको जन्मोत्सव समारोहमा सरिक हुन हरेक मार्च ११ आसपास जानाजान घाइते वा निलम्बित हुने गरेको अनुमान गरेका छन् ।

ब्राजिलको घरेलु क्लब सान्तोसमा फुटबल खेल्दा नेयमारलाई बहिनी भेट्न कुनै समस्या थिएन । बार्सिलोनासँग अनुबन्धित भई स्पेन पुगेको पहिलो वर्ष पनि उनी मार्च ११ मा फुटबल मैदानमै थिए ।

तर, स्पेनमा फुटबल खेल्न थालेको दोस्रो वर्षदेखि चाहिँ नेयमार हरेक मार्चमा घाइते वा निलम्बित हुन थाले । जब मार्चमा नेयमार फुटबल मैदान फर्किन्छ । के त्यति बेलासम्म पिएसजी च्याम्पियन्स लिगमा सुरक्षित होला त ?