प्लेअफमा पुग्नका लागि विराटनगरलाई १४९ रनको लक्ष्य

धनगढी- सन्नी पटेल र जयकिसन कोल्सावालाको आक्रमक अर्धशतकीय अविजित पारीको मद्दतले सवाइसी अत्तरियाले गर या मरको अवस्थामा रहेको विराटनगरलाई जितका लागि १ सय ४९ रनको लक्ष्य सुम्पेको छ । टस जितेर पहिले ब्याटिङ गर्ने निर्णय गरेको अत्तरियाले २० ओभरमा मात्र तीन विकेट गुमाउँदै १ सय ४८ रन जोडेको हो । 

उत्कृष्ट सुरुवात गरेको अत्तरियाका लागि जयकिसन कोल्सावालाले ५१ रनको अर्धशतकीय अविजित पारी खेले । उनले ५० बलको सामना गर्दै ५ चौका र २ छक्का प्रहार गर्दै ५१ रनको अर्धशतकीय अविजित पारी खेलेका हुन् । 

त्यस्तै निकै नै आक्रमक ब्याटिङ गरेका सन्नी पटेलले ६१ रन अविजित अर्धशतकीय पारी खेले । उनले ३१ बल खेल्दै ५ चौका र ४ छक्का प्रहार गरे । पटेलले खेलको अन्तिम ओभरमा २४ रन जोडे । जितेन्द्र सिंह ठकुरी १३, कप्तान दिपेन्द्रसिंह ऐरी १० र सन्दीप जोरा ३ रनमा पेभिलियन फर्किए । 

विराटनगरका लागि अभिनास यादव र सुसन भारीले एकएक विकेट लिए । विराटनगरले यो खेल जिते प्रतियोगिताको प्लेआफमा प्रवेश गर्ने छ । यदि पराजित भएको खण्डमा भने विराटनगर प्रतियोगिताबाट बाहिरिने छ । 

यता अत्तरियाको भने एक खेल बाँकी छ । अत्तरियाले आफ्नो लिग चरणको अन्तिम खेल काठमाडौं गोल्डेनससँग मंगलबार दिउँसो १ बजे खेल्ने छ ।