महेन्द्रनगरको पहिलो जित, अत्तरियाको हार

धनगढी- शरद भेषवाकरको कप्तानीमा रहेको महेन्द्रनगर युनाइटेड तेस्रो संस्करणको धनगढी प्रिमियर लिग (डिपिएल)मा आफ्नो पहिलो जित निकालेको छ । लिग चरणको आफ्नो अन्तिम खेलमा सिवाइसी अत्तरियासँग ७ विकेटले विजयी हुँदै प्रतियोगितामा पहिलो जित निकालेको हो । अब महेन्द्रनगरले अर्को चरणका प्रवेश गर्न अन्य टोलीको नतिजा पर्खनु पर्ने छ । यता अत्तरियाको भने यो पहिलो हार हो । 

अत्तरियाले दिएको ५५ रनको लक्ष्य पट्याएको महेन्द्रनगरले ५.४ ओभरमा मात्र ३ विकेट गुमाउँदै उक्त लक्ष्य भेट्टाएको हो । महेन्द्रनगरका लागि आनन्द सुब्रमन्नियमले १७ रन जोडे । उनले ९ बल खेल्दा २ चौका र १ छक्का प्रहार गरेका थिए । मोहमद नाभिद ६, शरद भेषवाकर ५ रनमा आउट भए । आरिफ सेख १८ रन र कुसल मल्ल ६ रनमा अविजित रहे । अत्तरियाका लागि भुवन कार्कीले दुई तथा दिपेन्द्र रावतले एक विकेट लिए ।

यसअघि टस जितेर पहिले ब्याटिङ गर्ने निर्णय गरेको अत्तरियाले निर्धारित ६ ओभरमा ५ विकेट गुमाउँदै ५४ रन जोडेको हो । अत्तरियाका लागि ओप्नर सन्नी पटेलले १९ रन जोडे । उनले ११ बल खेल्दै २ छक्का प्रहार गरेका थिए । त्यस्तै अर्का ओप्नर जयकिशन कोल्सावालाले १० रन जोडे । 

उनले ६ बल खेल्दा १ छक्का प्रहार गरेका थिए । कप्तान दिपेन्द्र सिंह ऐरीले १०, सन्दीप जोरा ४ र कमल सिंह ऐरी शुन्य रनमा आउट हुँदा भुवन कार्की र रित गौतम समान ४ रनमा अविजित रहे ।

महेन्द्रनगरका लागि सागर ढकाल र अभिनास बोहराले दुई दुई तथा शरद भेषवाकरले एक विकेट लिए । 

यसअघिको लिग चरणमा महेन्द्रनगरले लिगको पहिलो खेलमा रुपन्देही च्यालेन्जर्ससँग २ रनको झिनो अन्तरले पराजित भएको थियो । त्यस्तै दोस्रो खेलमा काठमाडौं गोल्डेन्ससँग ७ रनले पराजित भएपछि त्यसपछिका दुई खेलमा बर्षाका कारुण अंक बाढ्न बाध्य भएको थियो ।