एशिया छनोट : नेपालको पहिलो खेल मलेशियासँग 

काठमाडौं- नेपाली राष्ट्रिय महिला क्रिकेट टोलीले आईसीसी महिला टी-२० विश्वकपअन्तर्गत एशिया क्षेत्रको छनोट प्रतियोगिताको पहिलो खेल मलेसियासँग खेल्ने छ । थाइल्याण्डमा आज (शनिबार)बाट सुरु हुने उक्त छनोट प्रतियोगितामा आफ्नो पहिलो नेपालले यही फागुन ७ गते मलेशियासँग खेल्न लागेको हो । 

त्यस्तै दोस्रो खेल फागुन ९ गते आयोजक थाइल्याण्डसँग खेल्ने नेपालले १० गते संयुक्त अरब इमिरेट्स (यूएई), फागुन १२ गते हङकङ, १३ गते चीन र १५ गते कुँवेतसँग प्रतिस्पर्धा गर्नेछ । राउन्ड रोबिनका आधारमा हुने छनोटको शीर्ष स्थानमा रहने टोली विश्वकपका लागि छनोट हुनेछ । 

उक्त प्रतियोगिताका लागि नेपाली टोली आज थाइल्याण्ड प्रस्थान गर्नेछ । एशिया छनोटका लागि यसअघि नै रुविना क्षेत्रीको कप्तानीमा १४ सदस्यीय टोलीको घोषणा भैसकेको छ । अन्य सदस्यमा सीता रानामगर (उपकप्तान), सरिता मगर, नेरी थापा, इन्दु बर्मा, सोनु खड्का, आरती विडारी, काजल श्रेष्ठ, रोमा थापा, कविता कुँवर, अप्सारा बेगम, ममताकुमारी चौधरी, र विन्दु रावल छन् । 

त्यस्तै वैकल्पिकतर्फ चार खेलाडी छनोटमा परेका छन् । रितुकुमारी कनौजिया, सुमन विष्ट, अञ्जली चन्द र डोली भट्ट छन् । टोलीको मुख्य प्रशिक्षकमा विनोद दास छन् भने सहायक प्रशिक्षकमा नीरा राजोपाध्याय छन् ।