रिमालडाँडाको पानी विदुर ट्याङ्कीमा पुगेपछि खानेपानी सेवा सुचारु

नेपाल समय | शुक्रबार, भदौ २६, २०८३

नेपाल समय

शुक्रबार, भदौ २६, २०८३

रिमालडाँडाको पानी विदुर ट्याङ्कीमा पुगेपछि खानेपानी सेवा सुचारु

नुवाकोट। भोटेकोसी हुँदै त्रिशूली नदीमा आएको बाढीले पाइपलाइनमा क्षति पुर्‍याएपछि अवरुद्ध भएको विदुर क्षेत्रको खानेपानी सेवा सुचारु गर्ने प्रयासअन्तर्गत रिमालडाँडा मुहानको पानी विदुरको ट्याङ्कीमा ल्याइएको छ।

विदुर नगरपालिका–२ र ४ का बासिन्दाको खानेपानी समस्या समाधान गर्न नगरपालिकाको समन्वयमा आवश्यक पाइप उपलब्ध गराइएको थियो। सशस्त्र प्रहरी बलको श्रम सहयोगमा रिमालडाँडा हुँदै धोबीखोलाबाट विदुर ट्याङ्कीमा पानी ल्याउन सफल भएको नगरपालिकाले जनाएको छ।

बाढीका कारण खानेपानी सेवा प्रभावित भएपछि नगरपालिकाले विभिन्न बस्तीमा सेवा पुनःस्थापित गर्न आवश्यक लगानी, समन्वय र सहजीकरण गर्दै आएको छ। रिमालडाँडाको पानी ट्याङ्कीमा पुगेपछि विदुरका बासिन्दालाई खानेपानीको समस्या केही सहज हुने अपेक्षा गरिएको छ।

बाँकी क्षेत्रमा पनि खानेपानीलगायत बाढीबाट उत्पन्न अन्य समस्या समाधानका लागि नगरप्रमुख राजन श्रेष्ठ, उपप्रमुख प्रभा बोगटी तथा विभिन्न वडाका अध्यक्ष सक्रिय रूपमा लागिरहेको नगरपालिकाले जनाएको छ।

प्रकाशित: Sep 11, 2026| 21:08 शुक्रबार, भदौ २६, २०८३