‘नाडा अटो शो’को आज चौथो दिन, बुकिङ गर्नेले चाडपर्वमा गाडी पाउने

काठमाडौं- नाडा अटो शो २०२६ को आज चौथो दिन ह, भदौ ९ गतेबाट सुरु भएको अटो शो काठमाडौंको भृकुटीमण्डपमा चलिरहेको छ। भदौ १० गते अप्रत्याशित रुपमा भोटेकोशीमा आएको बाढीका कारण ठूलो जनधनको क्षेती पुग्यो। यसबाट अटोमोबाइल्स क्षेत्रपनि निकै प्रताडित बन्न पुग्यो। यद्यपि, आर्थिक गतिविधि चलायमान बनाउन ब्यवसायीहरुले कठिन समयमा पनि अटो शोलाई निरन्तरता दिए।

रसुवागढी-केरुङ नाका जोड्ने सडक बाढीका कारण क्षतिग्रस्त भएपछि चीनबाट नेपाल भित्रिने विद्युतीय सवारीसाधन (ईभी) को आपूर्ति प्रभावित हुने चिन्ता गाडी बुकिङ गर्नेहरुमा देखिएको छ। तर, ब्यवसायीहरु चाडपर्व आउन समय बाँकी रहेको कारण गाडी ल्याएर दिन सक्ने कुरामा ढुक्क देखिन्छन्।

व्यवसायीहरूले नाडा अटो शोमा बुकिङ भएका सवारीसाधनलाई वैकल्पिक नाका र मार्ग प्रयोग गरेर नेपालीहरूको प्रमुख चाड दशैं तथा तिहारसम्म ग्राहकलाई उपलब्ध गराउने बताए।

भन्सार नाकादेखि बाटोसम्म बगेको कारण केरुङ हुँदै चीनबाट आयात हुने सवारीसाधनको आपूर्ति ठप्प भएको छ। त्यसैले बैकल्पीक रुपमा तातोपानी र कोरोला नाका प्रयोग गरेर गाडी ल्याउने तयारीमा ब्यवसायीहरु जुटिसकेका छन्। त्यसैले नाडा अटो शोमा बुकिङ भएका गाडीको डेलिभरीमा ठूलो समस्या नआउने व्यवसायीहरूको दाबी छ।

अहिले बजारको सबैभन्दा ठूलो कार ब्राण्ड बीवाइडीले कोरोला नाका हुँदै गाडी ल्याउने छ। कम्पनीले अघिल्लो वर्षपनि कोरोला नाकाबाटै गाडीहरु ल्याएको थियो। बीवाइडीका ठूलो संख्यामा गाडी बाढीले बगाएको अबस्था भएपनि थप गाडी कोरोला नाकाबाट ल्याउने छ।

साइमेक्स इंकले पहिले नै सबै भन्सार बिन्दु प्रयोग गरेको कारण कुनै एउटा नाकामा समस्या हुँदा सप्लाईमा ठूलो असर नपर्ने कम्पनीका म्यानेजर आशिष शाक्यले बताए।

बजारमा चल्तीको अर्को ब्राण्ड दिपलका ईभीहरु थाइल्याण्डबाट आयात हुँदै आएको छ। एमएडब्लू वृद्धिका प्रमुख कार्यकारी अधिकृत ज्ञानेन्द्रबहादुर चन्दका अनुसार चाडपर्व लक्षीत गाडीहरु आउने क्रममै छन्। दिपलका एसयूभी भारत हुँदै वीरगञ्ज भन्सारबाट नेपाल आउने छन्।

‘दिपलका गाडी थाइल्याण्डमा उत्पादन हुन्छन् र भारत हुँदै नेपाल आउने छन्। त्यसैले नाडा अटो शोमा बुकिङ भएका सबै गाडी तिहारभित्र ग्राहकलाई उपलब्ध गराउँछौं’, सीईओ चन्दले भने।अहिले अटो शोमा सर्वाधिक चासो र चर्चामा रहेको नामी भिगो पनि चाडपर्वको समयमा आउने एमएडब्लु ग्रुपका कार्यकारी निर्देशक मिलनबाबु मल्लले जानकारी दिए।

‘हाम्रो करिब १५० वटा नामी ब्राण्डका ईभी रसुवा भन्सार क्षेत्रमा बाढीले बगाएको छ’, मल्लले भने, ‘अब नाडा अटो शोमा बुकिङ भएका तथा आगामी दिनमा बुकिङ हुने गाडी वैकल्पिक मार्ग प्रयोग गरेर नेपाल ल्याउनेछौं।’

नेपालमा चीनबाट विभिन्न ब्राण्डका सवारीसाधन आयात गर्ने व्यवसायीहरू अहिले वैकल्पिक नाका र मार्ग प्रयोग गर्ने तयारी सुरु गरेका छन्। सीजी मोटर्सले आयोन र रिडारा, जगदम्बा मोटर्सले प्रोटोन, पारामाउन्ट मोटर्सले एमजी र विलिङ तथा एसपीजी अटोमोबाइल्सले ओमोडा, जेको, चेरी क्यू र आइकार जस्ता ब्राण्ड चीनबाट आयात गर्दै आएको छ।

त्यसैगरी भिजी इम्पेक्सले ग्रेटवाल मोटर्सका उत्पादन ल्याएको छ । एलआरआर ग्रुपले स्काइवेल र जिली ब्राण्डका ईभी ल्याएका छन्। केई, बीएआइसी र आर्कफक्स जस्ता ब्राण्ड लक्ष्मी ग्रुपले चीनबाट आयात गर्दै आएको छ।

सबै ब्यवसायीले नाडा अटो शोमा ग्राहकले गरेको बुकिङलाई प्रभावित हुन नदिने र वैकल्पिक मार्ग प्रयोग गरेर भए पनि दशैं-तिहारको बजारलाई लक्षित गरी गाडी उपलब्ध गराउने तयारी थालेका छन्।नाडा अटो शो २०२६ भदौ ९ देखि १४ गतेसम्म काठमाडौंको भृकुटीमण्डपमा सञ्चालन भइरहेको छ।