गण्डकी प्रदेशमा कोरोनाबाट ज्यान गुमाउनेको संख्या एक हजार नाघ्यो

पोखरा– गण्डकी प्रदेशमा कोरोनाका कारण ज्यान गुमाउनेको संख्या एक हजार भन्दा माथि पुगेको छ। प्रदेशमा आइतबार एक महिनायताकै सबैभन्दा धेरै कोरोना संक्रमितको मृत्यु भएको छ। 

गण्डकी प्रदेश स्वास्थ्य निर्देशनालयका अनुसार आइतबार १२ जनाको ज्यान गएको छ। शनिबार १० जना संक्रमितको मृत्यु भएको थियो। पछिल्ला दिनमा कोरोना संक्रमितको संख्या बढेसँगै ज्यान गुमाउनेको संख्या पनि बढ्न थालेको छ।। शनिबार नवलपुरका ५ सहित स्याङ्जाका ४ र कास्कीका ३ जनाको ज्यान गएको हो।

यो सँगै प्रदेशमा कोरोनाबाट ज्यान गुमाउनेका संख्या १ हजार १ सय ९२ पुगेको छ। प्रदेशमा सक्रिय संक्रमितको संख्या ६ हजार १ सय ३८ पुगेको प्रदेश स्वास्थ्य निर्देशनालयका सूचना अधिकारी डा. बुद्धिप्रसाद पौडेलले जानकारी दिए। 

पौडेलका अनुसार गण्डकी प्रदेशमा हालसम्म २ लाख ९१ हजार ९७ जनाको कोरोना परीक्षण गरिएको छ। ती मध्ये ७५ हजार ६सय ८६जनामा कोरोना पोजेटिभ देखिएको छ। यसैगरी ८६ हजार ३ सय ६५ जना संक्रमित छन्। कुल संक्रमित मध्ये ६ हजार १ सय ३८ जना सक्रिय संक्रमित छन्। 

आइतबार २ सय ३२ संक्रमणमुक्त भएसँगै प्रदेशमा कोरोना निको हुनेको संख्या ६८ हजार ३ सय ५६ पुगेको छ।

प्रदेशमा लागु भएको निषेध आदेश खुकुलो भएसँगै नागरिकले स्वास्थ्य मापदण्ड नअपनाउँदा कोरोना संक्रमण बढेको प्रदेश स्वास्थ्य निर्देशक डा. खिमबहादुर खड्का बताउँछन्। कोरोना संक्रमण बढेसँगै प्रदेशका जिल्लाहरुमा निषेध आदेशलाई कडाइ गर्न थालिएको छ। यसैक्रममा वागलुङमा निषेध आदेशलाई कडाइ गरिएको छ।