खाने हैन त भानुको अनादीको खट्टे ?

तनहुँ- भानु नगरपालिका-१२ कवाचितस्थित रुप एण्ड अर्गानिक एग्रो फार्मले रैथाने खाद्यान्नको ‘ब्रान्डिङ’ गरी ‘भानुको अनादीको खट्टे’ उत्पादनमा जुटेका छन्। अनादीको चामललाई प्रवर्द्धन र आम्दानीसँग जोड्ने उद्देश्यले फार्मले भानुको अनादीको खट्टे बजारमा ल्याएको हो।

जिल्ला तथा नगरपालिका क्षेत्रमा उत्पादित अनादीको धानखेतीमा प्रोत्साहन पुर्‍याउने लक्ष्यका साथ ब्रान्डिङ गरी अनादीको खट्टे बजारमा ल्याइएको फार्मका सञ्चालक रामकृष्ण अधिकारीले बताए। भानु नगरपालिकाको समन्वयमा अनादी धानलाई खट्टे बनाएर बजार पठाइएको हो।

अनादीको धानखेती लोपोन्मुख भएकाले यसको प्रवर्द्धनका लागि अनादीको खट्टे बनाइएको उनले बताए। 'अनादीको धानखेती कम हुने गरेको छ, बढी उत्पादन लिने लक्ष्यका साथ स्थानीयले अन्य प्रजातिका धान लगाउने गर्दछन्', सञ्चालक अधिकारीले भने, 'रैथाने धान संरक्षण, प्रवर्द्धन तथा ब्रान्डिङ गरी आयसँग जोड्न अनादीको खट्टे बजारमा ल्याएका हौँ।'

भानु नगरपालिका कृषि विकास शाखाका प्रमुख विनोद थापा मगरले नगरपालिकाले रैथाने बाली कार्यक्रमअन्तर्गत ब्रान्डिङ र प्याकेजिङमा नगरपालिकाको सहयोग रहेको बताए। उनले भने, 'खाना, प्रविधि र गुणस्तर नियन्त्रणको विभागीय परीक्षण नगरपालिकाले गरेका छ, उत्कृष्ट ठहरिएपछि अनादीको खट्टे बजार पठाउन स्वीकृति दिइएको हो।'

नगरपालिकाका १३ वटै वडा तथा जिल्लाका किसानले उत्पादन गरेका अनादीलाई खट्टे बनाएर बजार पुर्‍याउने गरिएको कृषि शाखाले जनाएको छ। रासस