भ्रष्टाचारको मुद्दामा हदम्याद मान्दैनौं: रवि

राष्ट्रिय स्वतन्त्र पार्टी (रास्वपा) का सभापति तथा सांसद रवि लामिछानेले भ्रष्टाचारको मुद्दामा कुनै पनि किसिमको हदम्याद राख्न नहुने बताएका छन्। बिहीबार प्रतिनिधि सभा बैठकमा बोल्दै सभापति लामिछानेले आफ्नो पार्टी ५ वर्षे हदम्यादको विक्षमा प्रष्ट रहेको बताए।

‘कतै यो पास हुने त होइन, भ्रष्टाचारको मुद्दामा ५ वर्षे हदम्याद लाग्ने त होइन भन्ने चिन्ता रहेछ। म सिंगो सदन र देशलाई जानकारी गराउन चाहन्छु, भ्रष्टाचारको मुद्दामा ५ वर्षे हदम्याद लागू हुनेछैन। नो इफ, नो बट, हाम्रो कुरा क्लियर कट ! ५ वर्षे लागू हुने छैन,’ सभापति लामिछानेले भने।

उनले हिजो साँझदेखि अहिलेसम्म विभिन्न युवाहरूले यही विषयलाई लिएर २ हजारभन्दा बढी फोन आफ्नो मोबाइलमा आएको बताए। ‘हिजो साँझदेखि अहिलेसम्म मेरो टेलिफोनमा लगभग २ हजारभन्दा बढी टेलिफोन कल आएका छन्। अधिकांश युवाहरूले फोन गरेका छन्। सामाजिक सञ्जालमा एउटा भिडिओ बनेको रहेछ, जहाँ युवाहरूले चिन्ता व्यक्त गरेका रहेछन्,’ सभापति लामिछानेले भने, ‘भ्रष्टाचारको मुद्दामा ५ वर्षे हदम्याद हुनका लागि सचेत हुन भिडियो बनाइएको रहेछ। त्यहाँ यी मान्छेहरू समितिमा छन्, उनीहरूलाई कल गर्नू भनेर भनिएको रहेछ। लगभग १ डेढ सय फोन मैले रिसिभ पनि गर्न भ्याएँ।’