शल्यक्रियापछि एउटै व्यक्तिको पित्तथैली र मूत्रनलीबाट निकालियो ५५ वटा पत्थरी

झापा–झापाकी एक बिरामीको उपचारका क्रममा पित्तथैली र मूत्रनलीबाट शल्यक्रियामार्फत ५५ वटा पत्थरी निकालिएको छ। झापाको कचनकबल गाउँपालिका–६ की ५४ वर्षीया सुमित्रा साहको भद्रपुरस्थित ओमसाई पाथिभरा हस्पिटलमा उपचारका क्रममा ५५ वटा पत्थरी एकै पटकमा बाहिर निकालिएको हो।

अस्पतालका निर्देशक बालकुमार पोखरेलका अनुसार पेटभित्र असह्य दुखाइ बढेपछि उपचारका लागि साहलाई हस्पिटल भर्ना गरिएको थियो। ७ भदौमा सर्जन डा. शशी सिंहले सफलतापूर्वक शल्यक्रिया गरेका थिए।

‘सहन नसक्ने गरी पेटभित्र दुखाइ भएको भन्दै उहाँलाई अस्पतालमा भर्ना गरिएको थियो’, निर्देशक पोखरेलले उपचारबारे जानकारी दिँदै भने, ‘मेडिकल सुपरिन्टेन्डेन्टसमेत रहेका सर्जन सिंहले साहको स्वास्थ्य परीक्षणपछि तुरुन्त शल्यक्रिया गर्नुभएको हो।’ सबै जाँच प्रक्रिया पूरा भएपछि शल्यक्रिया गर्दा पित्तथैली र मूत्रनलीबाट ५५ वटा पत्थरी निकालिएको उनको भनाइ छ। 

साहको शल्यक्रिया सम्पन्न गर्न आठ घन्टा लागेको थियो। शल्यक्रियापछि उनको स्वास्थ्यमा सुधार आइसकेको र छिट्टै घर फर्किने तयारीमा रहेको छोरा दीपककुमार साहले बताए।

एउटै व्यक्तिको पित्तथैलीमा यतिका धेरै पत्थरी भेटिनु दुर्लभ भएको चिकित्सक बताउँछन्। ‘एउटै स्टोन हुँदा दुखेर बिरामी निकै पीडामा छटपटाउँछन्’, साहलाई अस्पतालको सर्जिकल वार्डमै भेटेर स्वास्थ्यलाभको कामना गरेका हल्दीबारी गाउँपालिका अध्यक्ष रवीन्द्र लिङ्देनले भने, ‘यति धेरै स्टोन बोकेर कसरी सहेर बस्नुभएको थियो होला भनेर म चकित भएको छु।’

अस्पतालका व्यवस्थापक मनोज दाहालले साहको पित्तथैली र मूत्रनलीबाट निकालिएका हरेक पत्थरी १२ एमएमभन्दा ठूलो रहेको जानकारी दिए।–रासस