बलात्कार अभियुक्त अस्पतालको शौचालयमा मृत फेला

विराटनगरस्थित नोबेल अस्पतालको शौचालयभित्र एक युवक मृत भेटिएका छन्। मोरङ प्रहरीका अनुसार मिक्लाजुङका ३३ वर्षीय पुरुष बुधबार बिहान अस्पतालको शौचालयभित्र झुन्डिएको अवस्थामा भेटिएका हुन्।

उनी आज बिहान ५:२० बजेतिर शौचालय छिरेका थिए। शौचालयबाट ननिस्किएपछि हेर्दा ढोका भित्रबाट बन्द गरी चुकुलको हेन्डिलमा झुन्डिएको अवस्थामा उनी भेटिएका थिए। मृतकले आफैंले लगाएको हरियो कपडा (गाउन)को पासो लगाएको देखिएको प्रहरीले बताएको छ।

१३ वर्षीय छोरीलाई करणी गरेको आरोपमा प्रहरीले उनलाई जेठ १२ गते पक्राउ गरेको थियो। अदालतबाट म्याद थप गर्न जिल्ला सरकारी वकिल कार्यालय मोरङ ल्याएको समयमा पनि उनले आत्महत्या प्रयास गरेका थिए। जेठ १४ गते आइतबार दिउँसो दुई बजेतिर घाँटी रेटेर आत्महत्याको प्रयास गरेपछि म्याद थप नगरी उपचारका लागि आफन्तको जिम्मा लगाइएको थियो।

सरकारी वकिल कार्यालयको थुनुवा कक्षको शौचालयमा फलामले घाँटी रेटेर आत्महत्या प्रयास गरेका उनलाई उपचारका लागि कोशी अस्पताल हुँदै नोबेल मेडिकल कलेज लगिएको थियो।