छुट्टा छुट्टै स्थानमा चार जना मृत भेटिए

काठमाडौं- देशका छुट्टा छुट्टै स्थानमा चार जनाको शव फेला परेको छ।  

बर्दियाको राजापुर नगरपालिका-१ टिउनीस्थित भदाली नालामा हाल नाम, थर, वतन नखुलेका ४० वर्षीय पुरुष र सोही नगरपालिका-१ मुर्गहवा घाटस्थित कर्णाली नदीको किनारमा हाल नाम, थर, वतन नखुलेका करिब ३५ वर्षीय पुरुष मंगलबार मृत अवस्थामा भेटिएका छन्।

त्यस्तै, बागलुङको बागलुङ नगरपालिका-१३ कालाखोलास्थित कालीगण्डकी नदीको किनारमा पर्वत जलजला गाउँपालिका घर भएकी ३६ वर्षीया पार्वती परियार मंगलबार मृत अवस्थामा फेला परेकी छिन्।

त्यस्तै, बाँकेको बैजनाथ गाउँपालिका-८ पिपरी बस्ने ६८ वर्षीय शिव बहादुर खत्री सोही ठाउँस्थित जेठीनाला पुलको मुनी किनारामा मंगलबार मृत अवस्थामा फेला परेका छन्। यस सम्बन्धमा प्रहरीले थप अनुसन्धान गरिरहेको छ।