स्वीट्जरल्याण्ड पठाइदिन्छु भनेर ७ लाख ठग्ने पार्वती पक्राउ

काठमाडौं- रोजगारीका लागि स्वीट्जरल्याण्ड पठाइदिने प्रलोभन देखाएर ठगी गर्ने पार्वती  थापा प्रहरीको फन्दामा परेकी छन्। 

काठमाडौं उपत्यका अपराध अनुसन्धान कार्यालयले काभ्रेको बनेपा नगरपालिका-४ घर भई हाल बाँकेको कोहलपुर नगरपालिका-११ दशबिगा बस्ने वर्ष ४६ की पार्वती थापालाई पक्राउ गरेको हो। उनले तुलाराम तारम मगरलाई रोजगारीका लागि स्विट्जरल्याण्ड पठाइदिन भनेर ७ लाख २० हजार रुपैयाँ लिएकी थिइन्। 

त्यहाँ पुगेपछि सुपरमार्केटमा प्याकिङको काम पाइने र मासिक १ लाख रुपैयाँ तलब हुने आश्वासन पार्वतीले दिएकी थिइन्। पैसा लिएर सम्पर्कविहीन भएपछि पीडित प्रहरीकहाँ पुगेका थिए। प्रहरीले पक्राउ परेकी थापालाई वैदेशिक रोजगार विभागलाई बुझाएको छ।