स्यालले रोक्यो यती एयरलाइन्सको उडान

काठमाडौं- जनकपुर विमानस्थलको रनवेमा स्याल कुदेपछि अवतरण नगरेर यति एयरलाइन्सको जहाज काठमाडौँ फर्केको छ। पाइलटले  पहिलो पटक पानी परेको हुँदा मौसमको कारण र दोस्रो पटक अवतरण गर्न खोजे पनि रनवेमा स्याल देखिएपछि यति एयरलाइन्सको जहाज काठमाडौं फर्केको हो। 

पाइलटले एटीसीलाई रनवेको अवस्थाको बारेमा जानकारी गराउँदा जहाज अवतरण नगर्न सुझाएपछि जहाज ओभरसुट गरी फर्केको एयरलाइन्सले जनाएको छ। जनकपुर विमानस्थलमा आएर काठमाडौँ फर्केका यति एयरका जहाजमा ६० जना सवार रहेको एयरलाइन्सले जनाएको छ।

जनकपुरको लागि साँझ ६:१० को जहाज ६:२० मा उडेको थियो भने जनकपुरबाट काठमाडौँको लागि ५९ जनाले टिकट बुकिङ गराएका थिए। काठमाडौँ फर्केको यतिका आजको फ्लाइट रद्द गरिएको एयरलाइन्सले जनाएको छन्। फ्लाइट रद्द हुँदा यात्रुहरू बिचल्लीमा परेका छन्। 

यसअघि जनकपुरबाटै काठमाडौं आउन लागेको बुद्ध एयरको उडान विमानभित्र मुसा भेटिएपछि रोकिएको थियो।