बझाङको यार्सा पाटनमा हिमपहिरो: तीनजना बेपत्ता

काठमाडौं-  बझाङको पाटनमा हिमपहिरो जाँदा यार्सा संकलनका लागि गएका तीनजना बेपत्ता भएका छन्। आइतबार बझाङको सुर्मा गाउँपालिका–२ भानसेरा पाटनमा हिमपहिरो गएको हो।

जिल्ला प्रहरी कार्यालय बझाङका अनुसार अन्य दुईजना घाइते भएका छन्। सञ्चार सम्पर्क हुन नसक्दा थप विवरण आउन नसकेको र उद्धारमा कठिनाइ भएको प्रहरीले बताएको छ। 

सोही पाटनमा यार्सा संकलनका लागि गएका स्थानीयले हिमपहिरोबारे जानकारी दिएका थिए। खबर पाएलगत्तै जिल्लाबाट प्रहरी र सशस्त्र प्रहरीको टोली घटनास्थलतर्फ गएको छ।

बझाङ सदरमुकामबाट हिँडेर त्यहाँ पुग्न डेढ दिन लाग्छ।