डोल्पामा इन्स्पेक्टरबाट हवल्दार कुटिए

काठमाडौं- जिल्ला प्रहरी कार्यालय डोल्पामा कार्यरत प्रहरी निरीक्षक नवीन चापागाईंले प्रहरी हवल्दार हरि आरसीमाथि कुटपिट गरेका छन्।

कुटपिटबाट सल्यानको शिद्धकुमाख गाउँपालिका-३ स्थायी घर भएका ३७ वर्षीय आरसीको बायाँ आँखा, नाक र मुखमा गहिरो चोट लागेको छ।

हवल्दार आरसी जिल्ला कारागार डोल्पामा कार्यरत छन्। घटना शनिबार बिहान करिब ११ बजेको हो। आफूलाई जिल्ला प्रहरी कार्यालयभित्रै बोलाएर प्रहरी निरीक्षक चापागाईंले कुटपिट गरेको हवल्दारले बताएका छन्।

हवल्दार आरसीको जिल्ला अस्पताल डोल्पामा सामान्य उपचार गरिएको छ। थप उपचारका लागि आज उनलाई नेपालगञ्ज लैजाने तयारी छ।