चीनमा बन्दैछ अत्याधुनिक एयरसिप

बेइजिङ-चीनको एभिएसन इन्डस्ट्री कर्पोरेसन (एभिक)ले नागरिक उड्डयनमा प्रयोग हुने एयरसिपको विकास गर्न शुरु गरिएको जनाएको छ ।

उक्त एयरसिप बढीमा १० यात्री क्षमताको हुनेछ । ३५ सय घनमिटरको एयरसिप आठ सय ४० किलो भारवहन क्षमताको हुनेछ । २४ घण्टा निरन्तर उड्न र एक हजार किलोमिटर पार गर्न सक्ने उक्त एयरसिप तीन हजार ५० मिटर उचाइसम्म जान सक्छ ।

एयरसिपको अग्रभागमा पाइलट र यात्री रहनेछन् । इन्धनसहितका इन्जिन पछाडिको भागमा रहनेछन् । अहिलेका हवाई जहाजहरूमा दायाँ–बायाँ रहने इन्जिनमै इन्धन भर्ने सुविधा छ ।

एयरसिपको फ्लाइट कन्ट्रोल प्रणालीले तत्काल मानवबाट गैरमानव प्रणालीमा स्विच गर्न सक्छ । र, रिमोट या सफ्टवेयरको माध्यमबाट जमिनबाटै यसलाई नियन्त्रित गर्न सकिन्छ ।

उक्त अत्याधुनिक एयरसिप हवाई पर्यटन, यात्री र माल सामान ढुवानीका लागि उपयुक्त हुने विश्वास त्यसको निर्माता एभिकका अधिकारीहरूको छ । आर्थिक रूपमा किफायती, सुरक्षित र आरामदायक हुने उनीहरूको भनाइ छ । 

यस अत्याधुनिक हवाई जहाजलाई पर्यटन, सर्वेक्षण, महासागरहरूमा निगरानी, सामान ढुवानी र आपतकालीन उद्धारलगायत काममा लगाइने उनीहरूले बताएका छन् । सन् २०२० सम्ममा एयरसिपको पहिलो उडान गर्ने लक्ष्य एभिकको छ ।