आजदेखि टेलिकमको भीओएलटीई सेवाको परीक्षण, यसरी गर्नुहाेस् प्रयाेग

काठमाडाैं - विश्व दूरसञ्चार तथा सूचना समाज दिवसको अवसर पारेर नेपाल टेलिकमले भ्वाइस ओभर (भीओ) एलटीई सेवाको परीक्षण सुरु गरेको छ।

टेलिकमका सेवालाई आधुनिकीकरण गर्ने भन्दै आजदेखि वायरलेस प्रविधिको चौथो पुस्ताको फोरजीमा एलटीई सेवाको परीक्षण सुरु गरिएको हो। उक्त सेवा प्रिपेड तथा पोस्टपेड फोरजी मोबाइलमा भीओ एलटीई सेवाको परीक्षण सुरु गर्न लागिएको टेलिकमका प्रवक्ता राजेश जोशीले जानकारी दिए। 

उनका अनुसार उक्त सेवाको उपलब्धतासँगै फोरजी मोबाइलमा हाई डेफिनेसन भ्वाइस, डायल गर्नासाथ सम्पर्क कायम हुने नेटवर्कको सहज उपलब्धताका साथै सेवामा थप गुणस्तरीयता महसुस गर्न सकिनेछ।

कसरी लिने सेवा ?

सो सेवाका लागि भीओएलटीई सपोर्ट गर्ने मोबाइलमा *४४४# डायल गरी प्राप्त निर्देशनको अनुशरण गरी सिममा भीओएलटीई एक्टिभेट गर्न सकिने छ।

यस्तै सो सेवा मोबाइलमा सक्रिय गर्नका लागि मोबाइलको सेटिङमा गई भीओएलटीई कल फर एनटीसी सिमसमेत इनेबल गर्नुपर्दछ। लगत्तै मोबाइल सेटको माथिल्लो लहरमा भीओएलटीईको संकेत देखा पर्दछ। भीओएलटीईको संकेत देखा परेपछि *१११# डायल गर्नुपर्दछ।

भीओएलटीई सेवाका प्रयोगकर्ताले नेपाल टेलिकमको नेटवर्कमा २८ दिनसम्म प्रयोग गर्न सक्नेछन् भने १०० मिनेट भ्वाइस सुविधा एकपटकका लागि निःशुल्क उपलब्ध गराइने छ।

आफ्नो मोबाइल सेटले भीओएलटीई सपोर्ट गर्छ/गर्दैन भनी थाहा पाउनका लागि तथा उक्त सेवासम्बन्धी थप जानकारीका लागि टेलिकमको वेबसाइटमा गएर लिंक प्रयोग गर्न सकिनेछ।