अब ठूला विमानमा झ्याल नराखिने

नेपाल समय | आइतबार, पुस १६, २०७४

नेपाल समय

आइतबार, पुस १६, २०७४

लन्डन- ठूला विमानमा यात्रा गर्दा धेरैको इच्छा हुन्छ, झ्यालतिरको सिटमा बस्ने र बाहिरको दृष्यमा हराउने । अब ठूला विमानहरूका झ्याल बन्द गरिने भएको छ । तिनको ठाउँ 'भर्चुअल' झ्यालले लिनेछन् ।

संयुक्त अरब इमिरेट्सको दुबईस्थित इमिरेट्स एयरलाइन्सका प्रमुख सर टिम क्लार्कका अनुसार बिनाझ्यालका विमानको सोच केही वर्षभित्रै पूरा हुँदैछ । गत बुधबार उक्त एयरलाइन्सका बोइङ ७७७-३०० ईआर विमानको प्रथम श्रेणीको क्याबिनमा उक्त प्रविधि जडान गरिएको छ ।

'फाइबर अप्टिक्स'मा जडित क्यामेराहरूको माध्यमबाट विमानभन्दा बाहिरको दृष्य क्याबिनमा देख्न सकिन्छ । क्लार्कका अनुसार यात्री जे देख्न चाहन्छन्, त्यही देखाइनेछ । झ्यालहरू हटाइँदा विमानको बनावट मजबुत हुने उनी बताउँछन् ।

झ्यालहरू हटाउँदा विमानको तौल कम हुने, इन्धन खपतमा कमि आउने र विमानको गति पनि बढ्ने उनको भनाइ छ ।

विमानसम्बन्धि विशेषज्ञ जोन स्ट्रिकल्यान्डको भनाइमा झ्यालहरू हटाउँदा विमानको डिजाइन चाहेअनुसार परिवर्तन गर्न सकिन्छ । तौल र इन्धन खपत कम गर्ने प्रयासमा यो कदम कोशेढुंगा सावित हुने उनको भनाइ छ ।

तर, यसमा असहमति जनाउने विशेषज्ञहरू पनि छन् । बेलायतको क्रेनफिल्ड विश्वविद्यालयका प्राध्यापक ग्राहम ब्रेथवेटको भनाइमा आपतकालीन अवस्थामा चालक दलले बाहिरको दृष्य देख्नु जरुरी हुन्छ । झ्याल नहुँदा त्यस्तो बेलामा जटिलता बढ्ने उनी बताउँछन् ।

प्रकाशित: Dec 31, 2017| 18:23 आइतबार, पुस १६, २०७४