आठ किलो प्लास्टिक खाएको ह्वेलको मृत्यु

एजेन्सी- जमिनमा मात्र होइन पानीमा पनि प्लास्टिकका कारण जीवनजन्तु समस्यामा पर्ने गरेका छन् । जमिनमा वातावरण प्रदूषणको प्रमुख कारण प्लास्टिक जन्य पदार्थ नै हुन् । पानी अर्थात समुन्द्र पनि प्लास्टिककै कारण प्रदूषित बन्दै गएको छ । 

प्लास्टिककै कारण सामुन्द्री जीवजन्तु पनि मर्न थालेका छन् । थाइल्यान्डमा समुन्द्रमा फालिएको प्लास्टिक खाएको एउटा ह्वेल माछा मरेको छ । मलेसियाको सीमाना नजिक भेटिएको ह्वेलले ८० वटा प्लास्टिकको झोला खाएको थियो । जसको तौल आठ केजी छ । 

गम्भीर विरामी भएको अवस्थामा भेटिएको ह्वेललाई उपचारको प्रयास गरिएपनि बचाउन नसकिएको पशुचिकित्सकहरुले बताएका छन् । 

सामुन्द्री जीवशास्त्री 'थोङ थामरोङनवासवाट' का अनुसार प्लास्टिक खाएका जीवले अन्य पौष्टिक खानेकुरा खान नसक्ने भएकाले ज्यान गुमाउने गर्दछन् । बिरामी भएको ह्वेलले पाँच वटा प्लास्टिकका झोला वान्ता गरेको थियो । 

विश्वमा थाइल्यान्ड एक सबैभन्दा वढि प्लास्टिकको झोला प्रयोग गर्ने देशको रुपमा चिनिन्छ । प्लास्टिक झोला कै कारण समुन्द्रमा प्रत्येक वर्ष कयौँ जीवहरु मर्ने गर्छन् ।