झण्डै १२ हजार स्थानमा दूरसञ्चार प्राधिकरणको इन्टरनेट

काडमाडौं- नेपाल दूरसञ्चार प्राधिकरणले दूरसञ्चार कोषको प्रयोग गरी करिब १२ हजार स्थानमा इन्टरनेट जडान सम्पन्न गरेको छ।

प्राधिकरणले गत फागुन मसान्तसम्म विभिन्न स्थानीय तह, माध्यमिक विद्यालय, वडा कार्यालय, स्वास्थ संस्था गरी ११ हजार ९६९ स्थानमा इन्टरनेट जडान सम्पन्न गरेको हो।

प्राधिकरणका अनुसार फागुनमसान्तसम्म ५५० स्थानीय तहका कार्यालयमा, ४ हजार ४७४ वडा कार्यालयमा, ३ हजार ७९२ माध्यमिक विद्यालय र ३ हजार १५३ स्थास्थ्य संस्थाहरुमा इन्टरनेट जडान सम्पन्न भएको छ।

प्राधिकरणले १८ प्याकेजमा काम गरी मुलुकभरि इन्टरनेट जडान गर्न ७०२ स्थानीय तहसँग सम्झौता गरेको थियो।

त्यस्तै ५ हजार ९३३ वडा कार्यालय, ५ हजार २२५ माध्यमिक विद्यालय र ४ हजार १२२ स्वास्थ संस्थासँग गरी कुल १५ हजार ९८२ स्थानमा इनटरनेट जडान गर्न सम्झौता गरेको थियो। सो अनुसार अझै ४ हजार १३ स्थानमा इन्टरनेट जडान भने बाँकी रहेको छ।

सरकारले यसअघि २०७२/०७३ देखि नै मुलुकभर ब्रोडब्याण्ड इन्टरनेट सेवा पुर्‍याउने घोषणा गरेको थियो। सो अनुसार १८ प्याकेजमध्ये १३ वटा प्याकजेमार्फत् ५० जिल्लामा सय प्रतिशत काम सम्पन्न भएको प्राधिकरणले जानकारी दिएको छ।

त्यस्तै २ वटा प्याकेज अन्तर्गत १० जिल्लामा ५० प्रतिशतभन्दा बढी काम सम्पन्न भएको प्राधिकरणले जनाएको छ।

त्यस्तै ३ वटा प्याकेजहरु मार्फत् १४ जिल्लाहरुमा नेटवर्क तथा कनेक्टिभिटी जडानको लागि सेवा प्रदायकहरु छनोट कार्य भइरहेको प्राधिकरणका प्रवक्ता मीन प्रसाद अर्यालले जानकारी दिए।