फेसबुकविरुद्ध गम्भीर आरोप, टुक्राटुक्रा पार्न माग गर्दै मुद्दा

एजेन्सी- सामाजिक सञ्जाल फेसबुकविरुद्ध गम्भीर आरोप लगाउँदै अमेरिकाका विभिन्न राज्यमा मुद्दा दर्ता भएको छ।

पहिलो पटक अमेरिकामा सरकारी निकायहरुले फेसबुकविरुद्ध मुद्धा दायर गरेका हुन्। ४८ वटा राज्यमा फेसबुकविरुद्ध मुद्दा दायर भएको छ।

फेसबुकले बजारमा अनुचित तरिकाबाट प्रतिस्पर्धा गरेको, नयाँ प्रतिस्पर्धी कम्पनीहरुलाई खरिद गरेर वा अनुचित लाभ दिएर कमजोर पारेको जस्ता आरोपहरु लगाएर फेसबुकविरुद्ध संघीय सरकारसहितका विभिन्न निकाय र विभिन्न राज्यका न्यायाधिवक्ताकाे कार्यालयले मुद्दा हालेका हुन्।

फेसबुकले डिजिटल बजारमा आफ्नो वर्चस्वको दुरुपयोग गरेको आरोपमा फेसबुक र उसको अर्को प्लेटफर्म इन्स्टाग्राम तथा ह्वाट्सएपलाई अलग–अलग बनाउन माग गर्दै मुद्दा दर्ता भएका छन्।

यसअघि फेसबुकले ह्वाट्स्एप तथा इस्टाग्रामलाई खरिद गरेर आफ्नो बनाएको थियो। अभियोजनकर्ताहरुको मागअनुसार फैसला आए फेसबुक टुक्राटुक्रा हुनेछ।

अमेरिकाको ‘एन्टीट्रस्ट’ कानूनअनुसार यो मुद्दा दर्ता गरिएको छ। यो कानुनको उद्देश्य उपभोक्ताहरुलाई कम्पनीहरुको शोषण व्यवहारबाट बचाउनु हो। साथै यो कानुनको उद्देश्य बजारमा स्वास्थ प्रतिस्पर्धा भइरहनु पर्छ भन्ने हो।

तर फेसबुकले आफूसँग प्रतिस्पर्धा गर्न आउने उस्तै प्रकृतिका सबैजसो कम्पनीलाई किन्ने गरेको छ। साथै उसले कतिपय कम्पनी किनेर बन्द गरिदिएको छ।

विगत केही वर्षदेखि फेसबुकले गरेको यस्तो क्रियाकलाप विरुद्ध अमेरिकाका सरकारी निकायहरु नै अदालत पुगेपछि फेसबुक अन्तर्गतका अन्य प्लेटफर्म टुक्रिन सक्ने सम्भावना बढेको हो।

फेसबुकले भने आफ्ना गतिविधि अमेरिकी संघीय कानूनअन्तर्गत नै रहेर गरिराखिएको दाबी गरेको छ।