अमेरिकी राष्ट्रपतीय चुनावमा रुबिन्सले अन्तरिक्षबाटै मतदान गर्ने

एजेन्सी- अमेरिकामा आगामी नोभेम्बर ३ मा राष्ट्रपतीय निर्वाचन हुँदैछ। निर्वाचन नजिकिँदै गर्दा मतदाताहरुमा उत्साह पनि बढ्दै गएको छ।

कोरोना महामारीकै बीच अमेरिकामा निर्वाचनको सरगर्मी बढिरहेको छ। यो निर्वाचनका लागि एक यस्ती मतदाता छन् जसले राष्ट्रपति निर्वाचनका लागि अन्तरिक्षबाटै आफ्नो मताधिकार प्रयोग गर्नेछिन्।

अन्तरिक्ष एजेन्सी नासाकी अन्तरिक्ष यात्री केट रुबिन्सले नोभेम्बर ३ मा अन्तरिक्षबाटै मतदान गर्ने योजना बनाएकी छन्।

उनले भनेकी छन्, ‘म पृथ्वीदेखि २०० माइल टाढा अन्तरिक्षमा छु, म यहीँबाट आफ्नो मताधिकार प्रयोग गर्नेछु।’

अमेरिकी अन्तरिक्ष एजेन्सीका अनुसार सन् २००९ मा केट रुबिन्स नासामा सहभागी भएकी हुन्। सन् २०१६ मा उनले चालक दलको सदस्यका रुपमा पहिलो आफ्नो अन्तरिक्ष अभियान पुरा गरिन्। 

धेरैजसो अमेरिकी अन्तरिक्ष यात्री ह्युस्टनमा बस्छन्। टेक्सासको कानूनले उनीहरुलाई सुरक्षित रुपमा इलेक्ट्रोनिक मतदानको अनुमति दिएको छ।

त्यही इलेक्ट्रोनिक मतपत्र अन्तरिक्षमा रुबिन्सका लागि पठाइने छ। उनले सुरक्षित रुपमा मतदान गरेको मतपत्र फिर्ता पठाउनेछिन्। यो इलेक्ट्रोनिक विधिको सदुपयोग गर्दै रुबिन्सले आगामी राष्ट्रपतीय निर्वाचनमा अन्तरिक्षबाटै मतदान गर्ने भएकी हुन्।