कोरोना संक्रमितलाई अस्पताल पुर्‍याउने बाकस निर्माण

काठमाडौं- राष्ट्रिय आविस्कार केन्द्रले कोरोना संक्रमितलाई सुरक्षित रुपमा अस्पतालसम्म पुर्‍याउन बाकस निर्माण गरेको छ।

खोज, अनुसन्धान र आविस्कारका क्षेत्रमा कार्यरत सो संस्थाले पछिल्लोपटक कोरोना संक्रमितहरुलाई अस्पतालसम्म सुरक्षित रुपमा लैजाने बाकस निर्माण गरेको हो।

बिरामीसँगै एम्बुलेन्समा रहने स्वास्थ्यकर्मी र चालकलाई कोरोना संक्रमणबाट जोगाउन यस्तो बाकस डिजाइन गरिएको केन्द्रका अध्यक्ष महावीर पुनले बताए।

उनले बाकसको डिजाइन, विकास र परीक्षणको काम पूरा भएको बताउँदै यो बाकसमा बिरामी राखेपछि हावा छिर्न नसक्ने र चेन लगाएर बन्द गर्न सकिने जानकारी दिए।

पुनका अनुसार बाहिरको हावा भित्र पठाउन प्वाल राखिएको छ भने भित्रको हावा बाहिर फाल्ने अर्को प्वालमा एन–९५ फिल्टर राखिएको छ। जसले गर्दा बिरामीको मुख र नाकबाट निस्किने हावालाई फिल्टर गरेर बाहिर पठाउन सकिन्छ।

बाकसभित्र हावा पठाउन र भित्रको हावा बाहिर फाल्न ब्याट्रीबाट चल्ने पंखा जडान गरिएको छ। बाकसलाई नेगेटिभ प्रेसर च्याम्बरको रुपमा डिजाइन गरिएको पुनले जानकारी दिए।

उक्त बाकस केही दिनभित्रै कोभिड-१९ को उपचार गर्ने अस्पताललाई उपलव्ध गराइने उनले बताए।