चीनले बनायो जमिन र पानी दुवै ठाउँमा उडान-अवतरण हुन सक्ने जहाज

एजेन्सी- चीनले आफ्नो पहिलो 'एम्फिबियस' विमान एजी-६०० को सफलतापूर्वक समुद्रमा परीक्षण गरेको छ। यो विमान समुद्र र जमिन दुबै ठाउँबाट उड्न र अवरण गर्न सक्छ।

यो विमानलाई चिनियाँ एभिएसन कम्पनी 'कर्फ अफ चाइना' (एभीआइसी) ले निर्माण गरेको हो। आइतबार चीनको स्यानडोङ प्रान्तको क्वीङदाओस्थित दक्षिण चीन सागरमा जहाजकाे परीक्षण गरिएको हो।

चीनमै निर्माण भएको यो विमानको उपयोग राहत, उद्धार तथा सामान ओसारपसारका लागि हुने ग्लोबल टाइम्सले जनाएको छ।

यो विमानले आइतबार क्वीङदाओस्थित समुद्रबाट उडेर स्यानडोङ प्रान्तको रिझाओ विमानस्थलमा अवतरण गरेको थियो।

यो संसारकै नयाँ प्रविधिको विमान भएको निर्माता कम्पनी एभीआइसीले दाबी गरेको छ। यो विमानको पहिलो स्थल उडान र अवतरण सन् २०१७ को डिसेम्बरमा गुआङदोङ प्रान्तमा गरिएको थियो।

एजी-६०० विमान सामुद्रिक लहर आएको बेलासमेत उडान र अवतरण गर्न सक्षम रहेको कम्पनीको दाबी छ।

यो विमानको सहयोगबाट समुद्रमा रहेका युद्धपोत, अन्य जहाजहरु तथा तेलका ट्यांकरहरुमा सामान पुर्याउन र ल्याउन सहयोग हुनेछ। साथै राहत र उद्धारका लागि यसले काम गर्न सक्नेछ।

स्थल र जल क्षेत्रमा सफलतापूर्वक परीक्षण सम्पन्न भएपछि यो जहाजलाई चीनले केही समयमा व्यवसायिक प्रयोगमा ल्याउने तयारी गरेको छ।
यो जहाज १२ टन तौल उठाउन सक्ने र ५० जनालाई बोक्न सक्ने क्षमताको छ। यो जहाज लगातार १२ घण्टा उडान गर्नसक्ने क्षमताको छ।