निष्क्रिय प्रयोगकर्ता हटाउँदै ट्विटर

सामाजिक सञ्जाल ट्विटरले ६ महिनाभन्दा बढी समयदेखि निष्क्रिय रहेका खाता बन्द गर्ने भएको छ । यसरी बन्द गरिने खातामा प्रयोगकर्ताको मृत्युका कारण निष्क्रिय रहेका खाताहरु पनि पर्नेछन् ।

६ महिनादेखि निष्क्रिय प्रयोगकर्ताले नयाँ परिवर्तित गोपनियता नीतिमा सहमति जनाउन नसक्ने भएकाले यसो गर्न लागिएको ट्विटरले बताएको छ । निष्क्रिय खाता बन्द गरेपछि अन्यको फलोअर संख्याप्रतिको विश्वसनीयता बढ्ने उसको भनाइ छ । पहिलो चरणमा बन्द गरिने खातामा अमेरिका बाहिरका रहनेछन् । हालका लागि लगइन गरेको आधारमा सक्रियता मानिने भए पनि भविष्यमा ट्विटरमा गरिने गतिविधिका आधारमा सक्रियता निर्धारण गरिने बताइएको छ ।

ट्विटरले असर पर्ने खाताका प्रयोगकर्ताहरूलाई ईमेलमार्फत् सूचना दिएको छ । उसले कति संख्यामा खाता बन्द गरिने भन्नेबारे बताएको छैन । तर यो संख्या लाखौं हुनसक्ने अनुमान गरिएको छ । विश्वभर साढे १५ करोडभन्दा बढी ट्विटर प्रयोगकर्ता छन् ।

बीबीसी