एसीसी प्रिमियर कप: मलेसियाले टस जित्यो, नेपालले पहिला बलिङ गर्दै

काठमाडौं- नेपालले मलेसियामा जारी एसीसी प्रिमियर कप अन्तर्गत आज मलेसियासँग खेल्दै छ। 

बाँगीस्थित वाईएसडी–युकेएम क्रिकेट मैदानमा हुने यस खेलमा मलेसियाले टस जितेर पहिला ब्याटिंग गर्ने निर्णय गरेको छ।

योसँगै नेपालले पहिला बलिङ गर्ने भएको छ।  

नेपालले यसअघि पहिलो खेलमा बहराइनलाई ७ विकेटले पराजित गर्दै प्रतियोगितामा विजयी शुरुवात गरेको छ। त्यस्तै मलेसियाले पनि आफ्नो पहिलो खेलमा साउदी अरेबियालाई ९३ रनले पराजित गरेर प्रतियोगितामा शानदार शुरुवात गरेको छ।

त्यस्तै, नेपाल रहेको समुह ए मा नेपाल र मलेसियासहित हङकङले पनि आफ्नो पहिलो खेल जितेको छ। त्यस्तै साउदी अरेबियाले आफ्ना दुवै खेल गुमाएको छ भने बहराइनले पहिलो खेलमा हार बेहोरेको छ।  

नेपालले यसखेलपछि तेस्रो खेल सेप्टेम्बर ६ मा साउदी अरेबियासँग, चौथो खेल सेप्टेम्बर ८ मा हङकङ चाइनासँग खेल्ने छ। यस प्रतियोगिताको विजेताले २०२७ को एसिया कपमा स्थान बनाउनेछ।

नेपाल क्रिकेट संघ (क्यान) ले यस प्रतियोगिताका लागि सन्दीप लामिछानेको कप्तानीमा १४ सदस्यीय टिम पठाएको छ। नेपाली टिममा सन्दीप लामिछाने (कप्तान), असिफ सेख, अर्जुन कुमाल, रोहित पौडेल, देव खनाल, दिपेन्द्र सिंह ऐरी, बसिर अहमद, इशान पाण्डे, गुलशन झा, शेर मल्ल, ललित राजबंशी, करण केसी, हेमन्त धामी र सन्दीप जोरा रहेका छन्।