टोरेसले दुई गोल गर्दै पिएसजीलाई हारबाट जोगाए

काठमाडौं। फ्रान्सेली शिर्ष डिभिजनको नयाँ सिजनमा साविक विजेता पिएसजीले रेनेससँग २-२ गोलको बराबरीमा रोकिएको छ। दुई गोलले पछि परेको पिएसजीलाई दोस्रो हाफमा मैदान प्रवेश गरेका फेरान टोरेसले दुई गोल गर्दै हारबाट जोगाएका हुन्।

रेनेसको घरेलु मैदानमा भएको खेलमा सेबास्टियन सिमान्स्कीले नवौँ मिनेटमा गोल गर्दै घरेलु टोलीलाई सुरुआती अग्रता दिलाएका थिए। उनको प्रहार पोलमा लाग्दै जाली चुमेको थियो। पिएसजीका डिजिरे डुएले गोल गरे पनि त्यो गोल अफसाइडका कारण मान्यता पाएन।

रेनेसले ३८औँ मिनेटमा अग्रता दोब्बर बनायो। प्रजेमिस्लाव फ्रान्कोव्स्कीको तल्लो क्रसमा एस्तेबान लेपोलले एक टचमै गोल गर्दै रेनेसलाई पहिलो हाफमा २-० को अग्रता दिलाएका थिए।

दोस्रो हाफमा पिएसजीले फेरान टोरेसलाई मैदानमा उतारेपछि खेलको दिशा बदलियो। ७१औँ मिनेटमा फाबियान रुइजको पासमा टोरेसले अफसाइड छल्दै गोल गरे र टोलीलाई खेलमा फर्काएका थिए। टोरेसले ८३औँ मिनेटमा व्यक्तिगत दोस्रो गोल गर्दै खेल २-२ को बराबरीमा पुर्‍याए। यसपटक पनि फाबियान रुइजकै पासमा उनले हेडमार्फत गोल गरेका थिए। नयाँ टोलीबाट पहिलो खेलमै दुई गोल गरेका टोरेसले पिएसजीलाई हारबाट जोगाएका थिए।

यस बराबरीसँगै पिएसजीले नयाँ सिजनको पहिलो खेलबाट एक अंक जोडेको छ। खेल पिएसजीको घरेलु मैदानमा हुने तय भए पनि मैदानको अवस्था खेलका लागि उपयुक्त नभएपछि रेनेसको रोआझोन पार्कमा सारिएको थियो।