विकट गाउँमा सडक नपुग्दा सास्ती

बागलुङ- जैमिनी नगरपालिका–८ सल्यानधारा गाउँमा अहिलेसम्म सडक पुगेको छैन। छिमेकी गाउँमा मोटर बाटो पुगेको वर्षौँ भयो। तर यस गाउँका स्थानीय गाडी चढ्नका लागि अर्को गाउँमा पुग्नुपर्ने बाध्यता छ। नगरपालिकाले सडक पुर्याउन वर्षौँदेखि प्रयास गर्दै आएको छ। वडा नं ८ कै केवैखानी गाउँ र सल्यानधाराको बीचमा ठुलो भिर र चट्टानसहितको पहरा हुँदा सडकले जोडिन नसकेको हो।

सल्यानधारालाई सडक सञ्जालमा जोड्न धुस, वाइनकुना र अर्को छिस्ती केवैखानी हुँदै सडकको निर्माण गरिँदै छ। केवैखानी हुँदै जोड्नका लागि अब करिब एक सय मिटर बाँकी रहेको जैमिनी नगरपालिकाका उपप्रमुख हरिहर शर्माले जानकारी दिए। वाइनकुनाबाट अझै डेढ किलोमिटर सडक निर्माण गरेपछि मात्र सल्यानधारा गाउँमा मोटर बाटो पुग्ने उनको भनाइ छ।

वाइनकुनाबाट जोड्न छोटो पर्ने भए पनि ठुलो भिर पहराका कारण अहिलेसम्म सडक पुर्याउन नसकेको शर्माले बताए। सल्यानधारालाई सडकले जोड्न हालसम्म रु दुई करोड बढी बजेट खर्च भइसकेको उनी बताउँछन्। निकै अप्ठ्यारो भूगोलका कारण अहिलेसम्म उक्त गाउँमा सडक नपुगेको उपप्रमुख शर्माको भनाइ छ। यस वर्ष पनि रु छ लाख बजेटले पहरा फोड्ने काम भइरहेको छ। बजेट व्यवस्थापन भए यसै वर्ष सल्यानधारामा सडक पुग्ने उनले बताए।

“सल्यानधारामा सडक पुर्‍याउनका लागि हामीहरूले प्रयास गर्दै आएको धेरै भयो, तर अहिलेसम्म पुर्याउन सकिरहेका छैनौँ, तर यस वर्ष जसरी पनि पुर्‍याउनुपर्छ भनेका छौँ, गाउँ जोड्ने बीचमा ठुलो चट्टानसहितको भिर हुँदा त्यसलाई फुटाउन गाह्रो भएको हो”, शर्माले भने, “यसपालि अलि कम बजेट थियो, यद्यपि काम राम्रै भयो, केही बजेट व्यवस्थापन गर्न सके यही आर्थिक वर्षभित्र सल्यानधारामा सडक पुर्याउन सकिन्थ्यो।”

स्थानीय डोल्मा गाहामगरले सडकले गाउँ नजोडिँदा यात्रा र सामान ढुवानी गर्न समस्या भोग्नुपरेको बताइन्। छिमेकी गाउँमा घर अगाडि नै गाडी गुड्ने भए पनि सल्यानधारानै यातायातको सुविधाबाट वञ्चित रहेको उनको भनाइ छ। अहिले पनि यस स्थानीयले बोकेरै नुन, तेल, चामललगायतका दैनिक उपभोग्य सामान लिने गरेको उनले बताइन्।

अर्का स्थानीय तुलबहादुर श्रीसले अहिले गाडी चढ्नका लागि ४५ मिनेट टाढा रहेको केवैखानीमा गाउँमा पुग्नुपर्ने बताए। यस गाउँमा करिब २५ घर परिवारको बसोबास छ। सबैभन्दा समस्या आकस्मिक सामान ढुवानीमा भएको उनको भनाइ छ। नगरपालिकाको सबै ठाउँतिर विकास हुँदै गए पनि आफूहरू ओझेलमा परेको श्रीसले सुनाए। भौगोलिक विकटताका कारण पछाडि परेको भन्दै राज्यले यस्ता दुर्गम ठाउँलाई प्राथमिकतामा राखेर विकास गर्नुपर्ने उनी बताउँछन्।   -रासस