उत्तर लेख्न थालेपछि एकाएक परीक्षा स्थगित

मध्यपश्चिम विश्वविद्यालयले आइतबार बिहान सुरु भइसकेको परीक्षा स्थगन गरेको छ।

ग्राजुएट स्कूल अफ ह्युमानिटीज एण्ड सोसल साइन्स अन्तर्गत स्नातक तहको पहिलो र सातौं सेमेष्टरको परीक्षा स्थगन गरिएको हो।

स्ववियु चुनावलाई देखाएर सुरु भइसकेको परीक्षा रोकिएको हो। यसमा विश्वविद्यालयले चरम लापरबाही गरेको भन्दै विद्यार्थीहरू असन्तुष्ट बनेका छन्।

बिहान साढे ६ बजे सुरु भएर प्रश्नपत्र र उत्तरपुस्तिका वितरण भइसकेका थिए। विद्यार्थीले उत्तर लेख्न सुरु गरिसकेका थिए। विश्वविद्यालयले परीक्षा स्थगित भएको विषयमा आधिकारिक र स्पष्ट जानकारी पनि दिएको छैन।

विश्वविद्यालयले  चैत १८ गते स्ववियु निर्वाचनको कार्यतालिका सार्वजनिक गरेको छ। विश्वविद्यालयले जारी गरेको सूचनामा चैत ३ गते बसेको संयुक्त विभागीय बैठकको निर्णय नं. १ अनुसार स्नातक तह प्रथम र सातौँ सेमेष्टरको परीक्षा अर्को सूचना नआएसम्म स्थगित गरिएको उल्लेख गरिएको छ। यद्यपि कारण भने खुलाइएको छैन।