बस्तीमा बाघ पसेपछि...

सप्तरीको सप्तकोसी नगरपालिका–१ फत्तेपुरको खोरिया टोलमा सोमबार बिहान बाघ पसेको छ। बाघको आक्रमणबाट स्थानीय दुई जना घाइते भएका छन्।

घाइते हुनेमा कृष्ण विष्ट र गणेश खत्री छन्। उनीहरुको स्थानीय क्लिनिकमा उपचार भइरहेको र अवस्था सामान्य रहेको जिल्ला प्रहरी कार्यालय सप्तरीले जनाएको छ।

आज बिहान सात बजेतिर बस्तीमा बाघ पसेको जानकारी प्रहरीले पाएको थियो। त्यसलगत्तै फत्तेपुरको प्रहरी टोली र कोशीटप्पु वन्यजन्तु आरक्षको टोली बस्तीमा पुगेको थियो।

बाघ कोशीटप्पु वन्यजन्तु आरक्षबाट बस्तीमा आएको अनुमान छ। बाघलाई जंगल क्षेत्रमै फर्काउने प्रयास भइरहेको प्रहरीले जनाएको छ।