भग्नावशेष बनेको गाजामा खोप अभियान

प्यालेस्टाइनको गाजा क्षेत्रमा शनिबारदेखि तेस्रो सामूहिक पोलियो खोप अभियान सुरु भएको छ। अभियानको लक्ष्य प्यालेस्टिनी क्षेत्रभर करिब छ लाख बालबालिकालाई पहिलो मात्रा दिने रहेको छ।

उत्तरी गाजाको जबालियाको मस्जिदमा १० वर्षमुनिका बालबालिकाले यो खोप लगाए। त्यहाँ गत वर्ष इजरायली सेनाको आक्रमणले धेरै भवनहरू भग्नावशेषमा परिणत गरेको छ।

खोप अभियानमा इजरायलद्वारा बहिष्कृत प्यालेस्टिनी शरणार्थीका लागि संयुक्त राष्ट्र राहत तथा कार्य एजेन्सी (युएनआरडब्लुए) सहित विभिन्न संयुक्त राष्ट्र एजेन्सीहरू संलग्न छन्। यो अभियान इजरायल र हमासले युद्धविराम पालना गरिरहेको समयमा आएको छ।

यस अभियानले फेब्रुअरी २६ सम्ममा पाँच लाख ९१ हजारभन्दा बढी बालबालिकालाई खोप लगाउने लक्ष्य राखेको विश्व स्वास्थ्य सङ्गठन (डब्लुएचओ) ले जनाएको छ।

“यस अभियानमा एक हजार सात सयभन्दा बढी युएनआरडब्लुए टोलीका सदस्यले भाग लिनेछन्”, युएनआरडब्लुए प्रमुख फिलिप लाजारिनीले एक्समा लेखिन्, “यो अभियान हालै फोहोर पानीमा पोलियो पत्ता लागेपछि सुरु गरिएको हो, जसले बालबालिकाको जीवनलाई जोखिममा पारेको छ। ”

बीस वर्षभन्दा बढीमा पहिलो पटक गाजामा अत्यधिक सङ्क्रामक रोग फेरि देखा परेपछि सन् २०२४ को अन्त्यमा अघिल्लो दुई अभियानहरू सञ्चालन गरिएको थियो।

इजरायल र हमासबीच १६ महिनाभन्दा बढीको युद्ध पछि गाजामा मानवीय अवस्था भयावह छ। युद्ध सुरु हुनुअघि नै यो क्षेत्र १५ वर्षभन्दा बढी समयदेखि इजरायलले लगाएको नाकाबन्दीको कारण सङ्घर्षरत थियो।

पानीको धेरैजसो पूर्वाधार नष्ट भएको छ, जसका कारण घना बस्ती भएका क्षेत्रहरू नजिक ढल खुला पोखरीमा जम्मा भएको छ। यी अवस्थाहरूले गत शरद ऋतुमा भाइरसको पुनरागमनमा योगदान पुर्‍यायो।

डब्लुएचओले फेब्रुअरी १९ मा फोहोर पानीको नमूनामा फेरि पोलियो भाइरसको अंशहरू फेला परेको रिपोर्ट गरेको थियो।

पोलियो अत्यधिक सङ्क्रामक छ र पक्षाघात निम्त्याउन सक्छ, मुख्यतया पाँच वर्षमुनिका बालबालिकालाई असर गर्दछ। यो रोग विश्वव्यापी रूपमा लगभग उन्मूलन भइसकेको छ।

सन् २०२३ अक्टोबर ७ मा हमासले इजरायलमाथि गरेको अभूतपूर्व आक्रमणपछि युद्ध भड्किएको थियो।  जनवरी १९ मा एक नाजुक युद्धविराम लागू भएको छ। -एएफपी