उत्पादनको बजार छ तर छैन कच्चा पदार्थ

गोरखा- गोरखामा झण्डै २० वर्षदेखि सञ्चालन हुँदै आएको नेपाली हाते कागज उद्योगलाई कच्चा पदार्थ अभाव हुन थालेको छ।

गोरखा नगरपालिका-६, स्थित नयाँबस्तीमा सञ्चालन हुँदै आएको गोरखा मनकामना नेपाली हाते कागज उद्योगले आवश्यकताअनुसार कच्चा पदार्थको नपाउँदा समस्या हुँदै आएको उद्योगका सञ्चालक पासाङ निमा शेर्पाले बताए।

उद्योगले कच्चा पदार्थको अभावमा माग अनुसार उत्पादन गर्नसक्ने अवस्था नरहेको उनको भनाइ छ। 'नेपाली हाते कागज उत्पादनका लागि हिमाली भेगका जंगलबाट लोक्ता खोजेर ल्याउनुपर्छ, शेर्पाले भने, 'जंगलमा बाह्रै महिना लोक्ता पाउन पनि गाह्रो छ।'

उद्योगले उत्तरी गोरखाको धार्चे, चुमनुब्री र अजिरकोट गाउँपालिका क्षेत्रका जंगलबाट कच्चा पदार्थ ल्याएर नेपाली कागज उत्पादन गर्दै आएको छ।

'वर्षभरी तीन महिना फागुन चैत र बैशाख महिनामा जंगलमा अरुबेला भन्दा धेरै कच्चा पदार्थ पाइन्छ ', उनले भने, 'तर जंगलमा गएर झिक्ने, सुकाउने र यहाँसम्म ल्याउने मान्छे नै पाउन गाह्रो छ।' जंगलबाट  झिकेर ल्याएको कच्चा पदार्थ उद्योगसम्म ल्याउन सडक समस्याका कारण थप कठिनाइ हुने गरेको छ।

शेर्पाको उद्योगमा उत्पादित नेपाली कागज बिक्रीका लागि बजारको भने कुनै समस्या नरहेको शेर्पाले बताए। 'उद्योगले जति उत्पादन गरेपनि बजारमा बिक्रीका लागि भने कुनै समस्या छैन’, उनले भने, 'बरु सधैँ कच्चा पदार्थको अभाव हुने गरेको छ।'

मजदुरहरुले जंगलबाट झिकेर ल्याएको लोक्ता प्रतिक्विन्टल १५ हजार रुपैयाँमा उद्योगले खरिद गदै आएको छ। 'रोजगारीका हिसावले त कच्चा पदार्थ संकलन गर्ने मजदुरहरुको पनि आम्दानी राम्रो हुन्छ', उनले भने, 'जंगलमा गएर खोज्नुपर्ने हुनाले अलि दुःख हुने भएकाले जो कोही तयार हुँदैनन्।'

उद्योगमा एक 'क्विन्टल' कच्चा पदार्थबाट दुई हजार थान (२०/३० साइज) को कागज उत्पादन हुने शेर्पाले जानकारी दिए। शेर्पाको उद्योगमा उत्पादित ४० ग्राम तौलका कागज भने नेपाल बाहिरसमेत निर्यात हुँदै आएको छ। रासस