भक्तपुरमा मोटरसाइकलको ठक्करबाट महिलाको मृत्यु

काठमाडौं- भक्तपुरमा मोटरसाइकलको ठक्करबाट पैदल यात्रुको मृत्यु भएको छ।

बुधबार दिउँसो सूर्यविनायक नगरपालिका-५ कटुन्जे चोकमा सूर्यविनायकबाट सल्लाघारी जाँदै गरेको मोटरसाइकलले पैदल यात्रुलाई ठक्कर दिएको जिल्ला प्रहरी परिसरले जनाएको छ।

मृत्यु हुनेमा भक्तपुर नगरपालिका-६ भोलाछेँ घर भई कटुन्जे बस्ने ६९ वर्षीया बिमला प्रधानाङ्ग छिन्। बागमती प्र.०२-०२१ प. ८१२७ नम्बरको मोटरसाइकलले ठक्कर दिँदा प्रधानाङ्ग गम्भीर घाइते भएकी थिइन्। उनको उपचारको क्रममा मृत्यु भएको हो।

घटनापछि मोटरसाइकल चालक फरार भएका थिए। चालक सुनापाती गाउँपालिका-५ घर भई चाँगुनारायण नगरपालिका-१ दुवाकोट बस्ने २६ वर्षीय दिपक मानन्धरलाई प्रहरीले पक्राउ गरेको छ।