काठमाडौं- त्रिभुवन अन्तर्राष्ट्रिय विमानस्थलमा भएको सौर्य एयरलाइन्सको विमान दुर्घटनामा अधिकांश यात्रुको मृत्यु भएको उद्धारकर्ताहरुले बताएका छन्।
जहाजमा चालक दलका सदस्य र यात्रु कति थिए भन्ने यकिन खुलेको छैन तर विमानमा १९ जना रहेको विवरणहरु आइरहेका छन्। उद्धारकर्ताहरुले केही शव निकालेका छन् र उद्धार जारी छ।
क्याप्टेन मनिष शाक्यको भने जीवितै उद्धार गरी अस्पताल लगिएको छ।
सौर्य एयरलाइन्सका अनुसार पोखरामा रहेको अर्को जहाज मेन्टेनेन्सको लागि कर्मचारीहरू लैजान लागिएको थियो। जहाजमा अधिकांश इन्जिनियर र प्राविधिकहरू थिए।
सौर्यको ९ एन-एएमई/सीआरजे २०० कलसाइनको जहाज बुधबार बिहान ११:११ बजे दुर्घटनामा परेको हो। जहाज रनवे ०२ तर्फबाट उडेको र पूर्वतर्फ रनवे २० नजिकै दुर्घटनामा परेको छ।