अवरुद्ध बेँसीसहर-चामे सडक अझै खुलेन

लमजुङ- अवरुद्ध बेँसीसहर-चामे सडक अझै खुल्न सकेको छैन। अविरल वर्षासँगै आएको बाढीले मनाङस्थित चामे गाउँपालिका-१ स्थित तिमाङखोलाले काठेपुल तथा तिमाङ ठूलो छहराको पक्की मोटरेबल पुल गत असार १८ गते बगाएपछि आवागन रोकिन पुगेको थियो।

सो सडक अन्तर्गत सानो छहराको पुलमा ढुंगा र ग्रेग्र्यान थुप्रिएर क्षति पुर्‍याएको सडक कार्यालयका सूचना अधिकारी तथा इञ्जिनीयर किरण पोखरेलले बताए। उनले भने, 'क्षति पुर्‍याएको स्थानमा संरचना बन्ने तयारीमा छ, तर तत्काल बनाउँदा पानीको सतह बढ्दा बगाउने धेरै सम्भावना हुन्छ।'

पानीको सतह कम भएपछि काठेपुल राखेर सवारी सञ्चालनमा ल्याउने कार्यालयले जनाएको छ।

विसंं २०७८ असार महिनामा आएको बाढीले बेलिब्रिज बगाएपछि तिमाङखोलामा काठेपुल राखेर सवारी सञ्चालन हुँदै आएको थियो। त्यस्तै, दुई वर्षअघि मात्र सो स्थानमा पक्की मोटरेबल पुल निर्माण गरेर सञ्चालनमा आएको थियो।

डुम्रे-बेँसीसहर-चामे योजना कार्यालयका अनुसार ठूलो छहरामा स्ल्याब कल्भर्ट पुल १९ लाख ९४ हजार तीन सय ७२ रुपैयाँ र सानो छहरामा स्ल्याब कल्भर्ट पुल एघार लाख ८५ हजार पाँच सय ३९ रुपैयाँ ५१ पैसा लगानीमा निर्माण गरिएको थियो।

तत्कालीन समयमा मनाङवासीलाई बेँसीसहर हुँदै काठमाडौं, पोखरा, चितवन जानलाई र सो स्थानबाट आउनलाई समस्या भएको छ। चामे गाउँपालिका अध्यक्ष लोकेन्द्रबहादुर घलेले सडक खुलाउन सडक विभागले प्रसास भए पनि पानीका कारण असफल भइरहेकोे बताए। उनले भने, 'सडक अवरुद्ध हुँदा दैनिक उपभोग्य सामग्री अभाव हुँदै गएको र महँगीसमेत बढ्न थालेको छ।'

यस सडकमा वर्सेनि वर्षात्का समयमा पटक-पटक सडक अवरुद्ध हुँदै आएको छ। विसं २०७८ असार १ गते आएको बाढीपहहिरोले चार महिनासम्म सडक अवरुद्ध बनाएको थियो। मनाङलाई सडक सञ्जालमा जोड्ने सरकारको योजना अनुरुप विसं २०५१ बाट सडक डिभिजन कार्यालय दमौली तनहुँले सडक निर्माण गर्न सुरु गरेको थियो।

नेपाली सेना कार्यागणले विसं २०६९ मा सडक निर्माण सम्पन्न गरेसँगै सडक डिभिजन कार्यालय दमौलीलाई हस्तान्तरण गरेपछि सडक सञ्चालन हुँदै आएको छ। तर बर्सेनि बर्खायाममा बाढीपहिरोले सडक अवरुद्ध बनाउँदा यात्रु तथा विषेश गरी मनाङवासी  समस्यामा पर्दै आएका छन्।

लामो समयसम्म सडक अवरुद्ध हुँदा हेलिकप्टरमार्फत बेँसीसहर हुँदै विभिन्न ठाउँमा जाने र सो ठाउँबाट आउने गर्दछन्। सडक अवरुद्ध हुँदा खाद्यान्न तथा लत्ताकपडासमेत लैजान समस्या हुँदा व्यवसायी मर्कामा पर्ने गरेका छन्। बेँसीसहर-चामे सडक ६५ किलोमिटर रहेको छ। लमजुङतर्फ ३५ किमी र मनाङतर्फ ३० किमी सडक रहेको छ। रासस