सात चरणको लोकसभा चुनाव आज सकिँदै

भारतमा सातौं तथा अन्तिम चरणको लोकसभाको चुनाव आज (शनिबार) हुँदै छ। आजको मतदानसँगै लोकसभाका सबै ५ सय ४३ निर्वाचन क्षेत्रको मतदान पूरा हुनेछ। 

गत अप्रिल १९ मा पहिलो चरणको मतदान भएको थियो। त्यसयता चरणबद्ध मतदान भएर सातौं चरणको मतदान जुन १ मा हुन लागेको हो। 
अन्तिम चरणमा ८ राज्यका ५७ लोकसभा सिटका लागि चुनाव हुँदैछ। अन्तिम चरणमा पञ्जाब र हिमाचलका सबै लोकसभा क्षेत्रमा चुनाव हुन लागेको हो।

त्यसबाहेक बिहारका ८, चण्डिगढका १, हिमाचलका ४, झारखण्डका ३ सिटमा चुनाव हुँदै छ। उडिसाका ६, पञ्जाबका १३, उत्तरप्रदेशका १३ र पश्चिम बंगालका ९ लोकसभा सिटमा चुनाव हुँदैछ। सबै क्षेत्रमा गरेर सातै चरणमा ९ सय ४ जना उम्मेदवार प्रतिस्पर्धामा छन्।

यस चरणमा प्रधानमन्त्री नरेन्द्र मोदीको निर्वाचन क्षेत्रमा पनि चुनाव हुँदैछ। उनको लोकसभा क्षेत्र वाराणसीमा मतदान हुन लागेको हो। मोदी वाराणसी क्षेत्रबाट तेस्रो पटक चुनाव लड्दै छन्।