बालकुमारी घटनाको सत्य-तथ्य छानबिन गर्न कांग्रेसको माग 

काठमाडौं- नेपाली कांग्रेसले कोरियाली भाषा परिक्षा सम्बन्धी विषय भएको प्रदर्शनमा सरकारले गरेको दमनको आलोचना गर्दै प्रदर्शनकारीले उठाएका विषयमा गम्भीर बन्‍न सरकारसँग माग गरेको छ। 

नेपाली कांग्रेसका प्रचार विभाग प्रमुख मीनबहादुर विश्‍वर्कमाले एक विज्ञप्ति जारी गर्दै बालकुमारी घटनाप्रति गम्भीर ध्यानाकृष्ट भएको उल्लेख गर्दै घटनाप्रति दुःख व्यक्त गरेको छ। विज्ञप्तिमा भनिएको छ, 'कोरियाली भाषा परिक्षा सम्बन्धी विषयलाई लिएर आज ललितपुरको बालकुमारी स्थित इपिएस कार्यालय अगाडि भएको प्रदर्शनका क्रममा मन्त्री सवार गाडीमा आगजनी हुनु, तत्पश्चात प्रदर्शनकारीलाई नियन्त्रणमा लिने क्रममा दुई जनाको मृत्यु र केही व्यक्ति घाइते भएको घटनाप्रति नेपाली कांग्रेसको गम्भीर ध्यानाकृष्ट भएको छ। नेपाली कांग्रेस उक्त घटनाप्रति दुःख व्यक्त गर्दछ। 
घटनाको सत्यतथ्य अध्ययन गरी यथार्थ छानबिन गर्नसमेत कांग्रेसले माग गरेको छ। भनेको छ, 'घटनाको सत्य–तथ्य अध्ययन गरी यथार्थ छानविन गर्नुका साथै घटनामा घाइते भएकाहरुको उचित उपचार गर्न र प्रदर्शनकारीले उठाएको विषयमा गम्भीर बन्न नेपाल सरकारसँग नेपाली कांग्रेस माग गर्दछ।'

त्यसैगरी प्रदर्शनकारीलाई आफ्ना विषयलाई शान्तिपूर्णरुपमा उठान गर्नसमेत अपिल गरेको छ। 'हरेक नागरिकले आफ्ना अधिकारको विषयलाई उठान गर्दा शान्तिपूर्ण, मर्यादित र हिंसारहित उपाय अवलम्वन गर्न प्रदर्शनकारीलाई आग्रह गर्दै सुरक्षा निकाय एवं सम्बन्धित सबै पक्षलाई संयमित रहन हार्दिक अपिल गर्दछ,' विज्ञप्तिमा भनिएको छ।