फेरि विमानस्थलबाट अवैध सुनसहित एक भारतीय पक्राउ 

काठमाडौं- त्रिभुवन अन्तर्राष्ट्रिय विमानस्थलबाट अवैध सुनसहित एकजना भारतीय नागरिक पक्राउ परेका छन्। पक्राउ पर्नेमा ५० वर्षीय जितेन्द्र मुलचन्द वावा छन्।

एयर अरेबियाको उडानमा चढेर सारजाहबाट काठमाडौं आएका उनको साथबाट १८० ग्राम अवैध सुन बरामद भएको विमानस्थल प्रहरी प्रमुख डीआईजी अर्जुन चन्द ठकुरीले जानकारी दिए।

उनका अनुसार उनले सर्ट तथा पाइन्टका बटम बनाएर सुन ल्याएको खुलेको छ । पक्राउ परेका जितेन्द्रमाथि थप अनुसन्धान भइरहेको छ।

यसअघि विमानस्थलबाट गत बिहीबार राति १४ किलो सुन बरामद भएको थियो। त्यसैगरी मंसिर २४ गते आइतबार विमानस्थलबाट साढे ६ किलो सुन बरामद भएको थियो।