जालसाजीको सिकार भएका पूर्वप्रधानाध्यापक राम आशीषले कहिले पाउलान् न्याय?

जनकपुरधाम–धनुषाको हंसपुर नगरपालिका–४ मणिपट्टिका ७० वर्षीय रामआशीष दास अवकाशप्राप्त शिक्षक हुन्। उनले १० वर्षअघि माध्यमिक विद्यालय शिक्षकबाट अवकाश लिएका थिए। दासले अवकाश हुँदा प्राप्त रकमबाट जनकपुरधाम–१६ पुल्चोकमा किराना पसल सञ्चालन गरी त्यसैबाट जीविकोपार्जन गर्दै आएको छ।

२४ वैशाख २०८० सम्म दासको व्यवसाय र समय ठीकठाक चलिरहेको थियो। तर, गत २५ वैशाखमा उनले अप्रत्यासित घटना सामना गर्नुप¥यो। राती ९ बजेको समय उनी फिल्मीशैलीमा कुटपिट र लुटपाटमा परे। उक्त रात दाससँग भएको १ लाख ५१ हजार नगद लुटपाट भयो।

उनलाई १५–२० वटा कागजको पानामा औँठा छाप लगाइयो। स्थानीयले खबर गरेपछि प्रहरी घटनास्थलमा पुगेर उद्धार गर्यो। ‘राती ९ बजेको थियो, म पसल बन्द गरेर घर जाँदै थिएँ, नकाबधारी  समूहले फिल्मीशैलीमा सडकमै कुटपिट गरी नगद लुटपाट गरे,’ दासले भने, ‘नकाबधारीले पेस्तोल, फलामे रड र लट्ठी बोकेका थिए। मैले रामविलास दास र इन्द्र दासलाई मात्र ठम्याउन सकें। उनीहरूले रोडभन्दा दुई सय मिटरजति उत्तरतर्फ खेतमा लगेर लुटपाट र कुटपिट गरे। कागजमा मेरो औँठाछाप लगाएर भागे । यो सबै घटना प्रहरीलाई थाहा छ।’

घटना भएको ६ महिना पूरा हुँदै छ। अहिलेसम्म दासको जाहेरी दर्ता भएको छैन। लुटपाटको भोलिपल्ट अर्थात् गत २६ वैशाखमा कपिलेश्वर प्रहरी चौकी र २७ वैशाखमा जिल्ला प्रहरी कार्यालय धनुषामा घटनाबारे जाहेरी दर्ता गराउन पुगे पनि पहिले घटनाबारे बुझ्छौं अनि दर्ता गरौंला भनेर त्यहाँबाट फर्काइएको दासले बताए। 

मंगलबार पत्रकार सम्मेलन गरी दासले गुनासो गरे, ‘मेरो जाहेरीको विषयमा प्रहरीसित पटक–पटक जानकारी लिन खोजें। तर, बुझ्दै छौं भनेर आलटाल गर्ने गरेका छन्। गत २१ साउनमा जनकपुरधामस्थित जिल्ला सरकारी वकिल कार्यालयलाई निवेदन दिएको छु। कार्यालयको चलानी नं ३२१ पत्रसहित हुलाकमार्फत जिल्ला प्रहरी कार्यालय धनुषामा जाहेरी पठाए पनि सुनुवाइ भएको छैन।’

करिब २० वटा कागजमा औँठाछाप लगाइएकामा एउटा कागज भने मिटरब्याजी शैलीमा रकम लिएको भनेर सार्वजनिक भएपछि आफू जालसाझीको सिकार भएको र त्यो विषय जानकारी गराउँदा पनि प्रहरीले सहयोग नगरेको दासको गुनासो छ।

सार्वजनिक भएको सो कागजमा घटना घटेको ६ वर्ष पुरानो मिति राखेर अर्थात् १४ माघ २०७४ मा दासले महोत्तरीको लोहरपट्टी–५ का ४२ वर्षीय अशोककुमार ठाकुरबाट सयकडा १० प्रतिशत ब्याजमा २० लाख ऋण लिएको उल्लेख छ।

‘२० वटा कागजमा औंठाछाप गरिएकामा एउटा मात्र सार्वजनिक भएको छ। त्यसपछि म निकै विक्षिप्त छु। बाँकी कागज सार्वजनिक हुन बाँकी  छन्’, दासले भने, ‘साहू भनिएका ठाकुरले ऋण असुलउपर गरिपाऊँ भनी कानुनी उपचारमा गएको जानकारी पाएको छु। अब भोलिपर्सी अरु कागज पनि आउलान्। म प्रधानाध्यापकबाट अवकाश पाएको व्यक्ति, यति ठूलो रकम कहिल्यै कसैसँग ऋण लिएको छैन। वृद्धावस्थामा दुःख पाएँ। कारण बुझ्न प्रहरीलाई गुहारे पनि न्याय पाइनँ। अब हदम्यादभित्रै अदालत जान्छु।’–रासस