नेपाल र युएईबीच फाइनल खेल हुँदै

काठमाडौं– त्रिदेशीय टी–२० सिरिजअन्तर्गत आज नेपाल र युएईबीच फाइनल खेल हुँदै छ। बिहान ११ बजेदेखि कीर्तिपुरस्थित अन्तर्राष्ट्रिय क्रिकेट मैदानमा नेपाल र युएईबीच फाइनल हुन लागेको हो। 

नेपालले लगातार चार वटा खेल जितिसकेको छ भने युएईमाथि दुई र हङकङमाथि दुई जित हात पारेको छ। गत सोमबार युएईसँग मूलपानी क्रिकेट मैदानमा भएको खेलमा नेपाल ५ विकेटले विजयी बनेको थियो।

१ कात्तिकमा भएको पहिलो खेलमा पनि नेपालले युएईलाई ७ विकेटले पराजित गरेको थियो। नेपालले हङकङलाई पनि २ कात्तिकमा ६ विकेटले र ४ कात्तिकमा ७९ रनले पराजित गरेको थियो।

नेपाल, युएई र हङकङ सम्मिलित तीन देश सम्मिलित खेलमा हङकङ बाहिरिइसकेको छ। युएई र हङकङले एकअर्कासँग एक–एक जित हात पारेका छन्। रन रेटको आधारमा युएई फाइनलमा प्रवेश गरेको हो।