त्रिदेशीय टी–२०: नेपालले हङकङलाई दियो २१४ रनको लक्ष्य

काठमाडौं– नेपालले त्रिदेशीय टी–२० सिरिजमा हङकङलाई २१४ रनको लक्ष्य दिएको छ। आज मूलपानी क्रिकेट मैदानमा टस जितेर ब्याटिङ रोजेको नेपालले २० ओभरमा ६ विकेट गुमाएर २१३ रन बनाएको हो।

नेपालका लागि कुशल मल्ल र दीपेन्द्रसिंह ऐरीले अर्धशतक रन पूरा गरेका छन्। मल्लले ४१ बलमा ९२ रन बनाएर आउट भए। उनले तीन चौका र ९ छक्का प्रहार गरेका छन्। दीपेन्द्रसिंह ऐरीले ३४ बलमा ५७ रन बनाएका छन्। उनले ६ चौका र दुई छक्का प्रहार गरी अर्धशतक पूरा गरेका हुन्।

ओपनर आसिफ शेखले १३ बलमा २० रन पूरा गरी आउट भएका थिए। कप्तान रोहित पौडेलले ११ रन, सोमपाल कामीले ८ रन र ओपनर कुशल भुर्तेल २ रन बनाएर आउट भएका थिए। 

नेपाल, हङकङ र युएईबीचको टी–२० सिरिजमा नेपालले दुई खेल जितेको छ। यसअघि गत बिहीबार नेपालले हङकङमाथि ६ विकेटको जित हात पारेको थियो। गत बुधबार नेपालले युएईलाई ७ विकेटले पराजित गरेको थियो। 

आइतबार हङकङ र युएईबीच खेल हुनेछ। सोमबार नेपाल र युएई, बुधबार हङकङ र युएईबीच र फाइनल खेल शुक्रबार हुनेछ। आगामी शुक्रबार अंक तालिकाको शीर्ष स्थानमा रहने दुई टिमबीच फाइनल खेलाइनेछ।