इजरायलबाट २५३ जना नेपाली विद्यार्थी बोकेर उड्यो जहाज  

काठमाडौं- प्यालेस्टिनी चरमपन्थी समूह हमास र इजरायलबीच जारी युद्धका कारण स्वदेश फिर्ताका लागि निवेदन दिएका नेपालीलाई लिन गएको नेपाल वायुसेवा निगमले २५३ जना नेपाली विद्यार्थी बोकेर इजरायलबाट उडेको छ। इजरायली समय अनुसार १:३० अर्थात नेपाली समय अनुसार ४:५५ बजेतिर विमान उडेको बताइएको छ। 

सुदूरपश्चिम विश्वविद्यालय, कृषि तथा वन विज्ञान विश्वविद्यालय र त्रिभुवन विश्वविद्यालयका २५३ जना विद्यार्थी बोकेको जहाज नेपालका लागि उडेको हो।

उनीहरूलाई लिनका लागि परराष्ट्रमन्त्री एनपी साउद आफैँ इजरायल पुगेका छन्। इजरायल र गाजाबीचको युद्धका कारण कृषि क्षेत्रमा इन्टर गर्न पुगेका विद्यार्थीहरू स्वदेश फर्किन लागेका हुन्।