किशोरी बलात्कार आरोपमा चार जना पक्राउ

सुर्खेतमा १३ वर्षीया किशोरीलाई बलात्कार गरेको आरोपमा चार जना पक्राउ परेका छन्। पक्राउ पर्नेमा सुर्खेतको पञ्चपुरी नगरपालिकाका १५, १६ र १९ वर्षका किशोर छन्।

बिहीबार राति घर नजिकै नाच हेर्ने गएकी ती किशोरीलाई चार जनाले फरक-फरक स्थानमा लगेर बलात्कार गरेको जिल्ला प्रहरी कार्यालय सुर्खेतले जनाएको छ। पक्राउ परेका सबैले एकअर्कालाई राम्ररी चिन्ने र एउटै गाउँका भएका कारण बलात्कारको घटना योजनाबद्ध रूपमा घटेको प्रहरीको अनुमान छ।

चारै जनाविरुद्ध मुद्दा दर्ता गरेर थप अनुसन्धान भइरहेको र किशोरीको प्रदेश अस्पताल सुर्खेतमा स्वास्थ्य परीक्षण गरिएको प्रहरीले जनाएको छ।